Plis pase 400 ane apre yo te fin rebati miray Jerizalèm yo, te gen yon prèt yo te rele Zakari ak madanm li, Elizabèt, ki t ap viv toupre vil la. Yo te gen plizyè ane depi yo marye, men, yo pa t gen pitit. Yon jou, pandan Zakari t ap boule lansan anndan tanp lan, zanj Gabriyèl te parèt devan l. Zakari te pè anpil, men, Gabriyèl di l: ‘Ou pa bezwen pè. Jewova ban m yon bon nouvèl pou m ba ou. Elizabèt, madanm ou, pral fè yon pitit gason, l ap rele Jan. Jewova chwazi Jan pou yon travay espesyal.’ Zakari te mande zanj lan: ‘Ki jan pou m fè kwè w? Madanm mwen avè m, nou twò granmoun pou n fè pitit.’ Gabriyèl di l: ‘Se Bondye ki voye m vin ba w nouvèl sa a. Men, piske w pa kwè m, ou pap kapab pale jiskaske tibebe a fin fèt.’

Zakari te fè plis tan anndan tanp lan pase sa l konn abitye fè. Lè l resi soti, moun ki t ap tann deyò yo te vle konnen ki sa k te rive. Zakari pa t ka pale. Li te sèlman ka fè jès ak men l. Lè sa a, moun yo vin konprann Zakari te resevwa yon mesaj nan men Bondye.

Rive yon lè, Elizabèt te vin ansent e l te fè yon tigason. Konsa, pawòl zanj lan te di yo te reyalize. Zanmi l yo ak moun nan fanmi l yo te vin wè tibebe a. Se pa ti kontan yo te kontan pou li! Elizabèt di yo: ‘Pitit la rele Jan.’ Yo di l: ‘Pa gen yon moun nan fanmi w ki rele Jan. Rele l Zakari menm jan ak papa l.’ Men, Zakari te ekri pawòl ki vin apre yo: ‘Se Jan ki non pitit la.’ Menm kote a, Zakari te vin ka pale ankò! Tout moun nan Jide te vin tande pale de tibebe a, e moun yo t ap mande tèt yo: ‘Ki sa timoun sa a ap ye lè l vin gran?’

Lè sa a, Zakari vin ranpli ak lespri sen. Men sa l te anonse: ‘Se pou moun fè louwanj pou Jewova. Li te pwomèt Abraram li t ap voye yon sovè, anpalan de  Mesi a, pou delivre nou. Jan ap vin yon pwofèt ki pral fè konnen Mesi a ap vini.’

Epitou, gen yon bagay espesyal ki te rive Mari ki te fanmi Elizabèt. Ann wè ki sa k te pase nan chapit ki vin apre a.