Ozombura zokombanda 400 otumbo twaJerusalem tji twa za nokutungururwa, omupristeri wena Sakarias nomukazendu we Elisabet va turire meṋe yotjihuro. Owo va kupasanene oure wozombura ozengi posiya kava ri novanatje. Eyuva rimwe ngunda Sakarias ama twimisa ovyomoro omuwa mOndjuwo Ondjapuke yaMuhona, omuengeli Gabriel wa munika ku ye. Sakarias wa urumine tjinene, posiya Gabriel wa tja ku ye: ‘O tira. Ami mbe ku etere ombuze ombwa okuza ku Muhona. Omukazendu woye, Elisabet, ma panduka omuatje omuzandu nena re mari rire Johanes. Muhona we mu toorora kutja ma ungure otjiungura tjapeke.’ Sakarias we mu pura na tja: ‘Ihi ami me tji tjiwa vi? Ami nomukazendu wandje twa kurupa okupanduka omuatje.’ Gabriel wa tja: ‘Ami mba hindwa i Muhona kutja mbi yekukupa ombuze ndji. Posiya mena rokutja kokamburire momambo nga, ove ko nakuhungira nga omuatje woye tja pandukwa.’

Sakarias eyuva ndo wa kara orure mOndjuwo ondjapuke yaMuhona. Okutja tja pita, ovandu tjandje mave mu undjire pendje amave vanga okuzuva kutja pa kayenda tjike. Sakarias kaa yenene okuhungira. Eye aa yenene okuungurisa omake we uriri. Okuzambo va muna kutja Sakarias wa munu ombuze okuza ku Mukuru.

Kombunda Elisabet wa rira otjingundi na panduka omuatje omuzandu otja omuengeli pa heya. Omapanga novazamumwe na ye ve ya okutara okanatje. Owo va ri nenyando tjinene. Elisabet wa tja: “Eye ma rukwa ena Johanes.” Owo va tja: ‘Kape nomundu meṱunḓu roye ngu nena Johanes. Mu ruka Sakarias, tjimuna ihe.’ Posiya Sakarias wa tjanga omambo ngu maye tja: “Ena re oJohanes.” Nu oruveze ndwo Sakarias wa uta okuhungira rukwao! Ombuze ohunga nokanatje ya handjauka moJudea atjihe novandu va himinwe nave tja: ‘Omuatje ngwi ma kasana pi tje kuru?’

Okuzambo Sakarias we urisiwa nombepo ondjapuke. Eye wa hunganeka na tja: ‘Nga tangwe Muhona Ndjambi. Eye wa kwizikira Abraham kutja ma hindi omuyame,  Messias, ngu me tu kutura. Johanes ma rire omuprofete nu ma rongerisire Messias ondjira.’

Pe notjiṋa otjihimise tji tja tjitwa komuzamumwe waElisabet wena Maria. Matu kerihonga ohunga na tjo mekondwa ndi mari kongorere ko.