Yerusalem mare bai gawgap ngut ai shaning 400 na ai hpang, hkinjawng Zakari hte shi a madu jan Elisabet gaw dai mare makau hta shanu nga ai. Shan dinghku de ai shaning grai na sai raitim, ma n lu shi ai. Lani mi hta, nawku htingnu kaw na chyoi pra ai gawk hta, manam pyaw ai baw hpe Zakari nat nawng nga ai shaloi, lamu kasa Gabriela dan pru wa ai. Zakari hkrit kajawng mat yang, Gabriela ndai hku tsun ai: ‘Hkum hkrit u. Ngai gaw Yehowa kaw nna kaja ai shiga sa tsun ai re. Na a madu jan Elisabet gaw shadang sha shangai wa nna, dai ma a amying hpe Yawhan ngu shamying na re. Yehowa gaw Yawhan hpe laksan bungli galaw na matu lata da sai.’ Zakari ndai hku san ai: ‘Ngai gara hku kam lu na kun? Ngai hte nye madu jan gaw grai asak kaba sai. Ma lu na matu n mai byin sai.’ Gabriela ndai hku tsun ai: ‘Nang hpe ndai shiga tsun na matu Karai Kasang gaw ngai hpe dat dat ai re. Raitim, nang gaw ngai hpe n kam ai majaw, ma shangai wa ai aten du hkra ga lu shaga na n re.’

Zakari gaw chyoi pra ai gawk hta shawoi na hta grau na taw nga ai. Shinggan kaw la taw nga ai masha ni gaw, shi hpa majaw na taw nga ai hpe chye mayu ma ai. Zakari pru wa ai shaloi, ga n lu shaga sai. Shi gaw lata kumla hte sha lu tsun sai. Dai majaw, Zakari gaw Karai Kasang kaw nna shiga lu wa sai ngu ai hpe masha ni chye mat ma ai.

Dai hpang, lamu kasa tsun ai hte maren, Elisabet gaw ma hkum kap wa nna, shadang sha shangai wa ai. Shi a manang ni hte jinghku jingyu ni gaw, ma hpe sa yu ma ai. Shanhte gaw Elisabet a matu grai kabu ya ma ai. Elisabet ndai hku tsun ai: ‘Ndai ma a amying hpe Yawhan ngu shamying ya na re.’ Shanhte ndai hku tsun ai: ‘Nanhte a dinghku hta, Yawhan ngu ai amying n nga ga shi ai gaw. Shi kawa a amying Zakari sha bai shamying ya dat u.’ Raitim, Zakari gaw ndai hku laika ka nna madun dat ai: ‘Shi a amying gaw Yawhan re.’ Dai shaloi jang, Zakari bai ga shaga lu sai! Dai ma hte seng ai lam gaw, Yuda mung ting chyam bra mat nna, masha ni gaw: ‘Dai ma kaba wa yang hpa byin wa na kun?’ nga nna chye mayu taw nga ma ai.

Dai hpang, Zakari gaw chyoi pra ai wenyi hte hpring wa ai. Shi ndai hku myihtoi htoi ai: ‘Yehowa hpe shakawn kungdawn mu.  Shi gaw anhte hpe hkye la na matu, Meshia hpe shangun dat na nga nna Abraham hpe ga sadi jaw wa ai. Yawhan gaw myihtoi byin wa nna, Meshia a matu lam hkyen lajang ya na re.’

Elisabet a jinghku Mari hta mung mauhpa mabyin langai byin wa ai. Dai lam hpe hpang na daw hta hkaja yu ga.