Más di 400 anu dipôs ki paredis di Jiruzalen konpodu, un saserdóti ki txomaba Zakarias ku se mudjer Elizabeti, ta moraba pértu di sidadi. Dja es tinha txeu anu kazadu, má es ka tinha ninhun fidju. Un dia, kantu Zakarias staba ta oferese insénsu na Lugar Santu na ténplu, anju Gabriel parse. Zakarias fika ku medu, má Gabriel fla-l: ‘Bu ka meste xinti medu. N tene un notísia sábi di Jeová pa bo. Elizabeti bu mudjer, ta ben ten un fidju i se nómi ta ser Juan. Jeová skodje Juan pa un trabadju spesial.’ Zakarias fla: ‘N ka ta kridita! Mi ku nha mudjer dja nu sta bédju pa ten fidju.’ Gabriel fla-l: ‘Deus ki manda-m pa N ben da-u es notísia. Má dja ki bu ka kridita, bu ta ben fika mudu ti ki mininu nase.’

Zakarias fika txeu ténpu na Lugar Santu, más di ki kustumu. Nton kantu el sai, povu sta ta speraba el pa sabe kuzê ki kontise ku el. Zakarias ka konsigi pâpia. El sta fazeba sô sinal ku mô. Nton es da kónta ma Zakarias resebe un mensaji di Deus.

Dipôs, Elizabeti fika grávida i el ten un rapazinhu, sima anju dja flaba. Famílias ku amigus di Elizabeti bai odja mininu. Es fika uma kontenti ku el. Elizabeti fla: ‘Se nómi ta ser Juan.’ Es fla: ‘Ka ten ningen na nhos família ki txoma Juan. Nhos pô-l nómi di se pai, Zakarias.’ Má Zakarias skrebe: ‘Se nómi é Juan.’ Kel óra, Zakarias kumesa ta pâpia otu bês! Nobidadi sobri kel mininu spadja pa tudu Judea i es fika ta pergunta: ‘Kuzê ki kel mininu ta ben da?’

Dipôs Zakarias fika xeiu di spritu santu. El fla: ‘Pa Jeová ser lovadu. El promete Abraon ma El ta mandaba un salvador, ki é Misías pa salva-nu. Juan ta ser proféta i el ta pripara kaminhu pa Misías.’

 Tanbê kontise un kuza spesial ku un família di Elizabeti ki txomaba Maria. Nu ta ben sabe é kuzê na kel otu lison.