တၢ်မၤလိ ၆၈
နီၢ်အ့းလံၤစါဘ့းဒိးန့ၢ်ဘၣ် ဖိခွါတဂၤ
ဖဲတၢ်ဘှီဂ့ၤထီၣ်က့ၤ ဝ့ၢ်ယရူၤၡလ့ၣ်အဒူၣ် ပူၤကွံာ်အနံၣ် ၄၀၀ ဝံၤအလီၢ်ခံ ပှၤလုၢ်တၢ်အဒိၣ်စီၤစဃၤရံဒီး အမါနီၢ်အ့းလံၤစါဘ့း အိၣ်ဝဲဘူးဒီးဝ့ၢ်ယရူၤၡလ့ၣ်လီၤ. အဝဲသ့ၣ်ဖျီအသးဖးယံာ်လံ ဘၣ်ဆၣ် အဖိတအိၣ်နီတဂၤဒံးဘၣ်. ဘၣ်တနံၤဖဲ စီၤစဃၤရံလဲၤစိာ် တၢ်ဆိၣ်ကဲၤနၢမူလၢ ယွၤအတၢ်လုၢ်ဟံၣ်ပူၤအခါ မူခိၣ်ကလူးကၤဘြံၤအ့လး လီၣ်ဖျါထီၣ်အသးလၢအမဲာ်ညါလီၤ. စီၤစဃၤရံပျံၤတၢ်ဒိၣ်မး ဘၣ်ဆၣ်ကၤဘြံၤအ့လးတဲဘၣ်အီၤလၢ– ‘ပျံၤတၢ်တဂ့ၤ. ယကတဲဘၣ်နၤ တၢ်သးခုကစီၣ်လၢ ယဟိဝၤယွၤအအိၣ်လီၤ. နမါနီၢ်အ့းလံၤစါဘ့း ကအိၣ်ဖျဲၣ်ထီၣ် ဖိခွါတဂၤဒီး နဘၣ်ကိးန့ၢ်အမံၤလၢ စီၤယိၤဟၣ်လီၤ. ယဟိဝၤယွၤဃုထၢထီၣ် စီၤယိၤဟၣ်လၢကမၤဝဲ တၢ်မၤလၢအရ့ဒိၣ်တခါလီၤ.’ စီၤစဃၤရံတဲဝဲလၢ– ‘ယနာ်နၤကသ့ဒ်လဲၣ်. ယၤဒီးယမါန့ၣ် ပသးပှၢ်ဒိၣ်မးလံအဃိ ပဖိအိၣ်တသ့လၢၤဘၣ်.’ ကၤဘြံၤအ့လးတဲဝဲလၢ– ‘ကစၢ်ယွၤဆှၢလီၤယၤလၢ ယကဘၣ်ဟဲတဲနၤ တၢ်ကစီၣ်အံၤလီၤ. ခီဖျိလၢ နတနာ်ယတၢ်ကတိၤအဃိ နတဲတၢ်တသ့လၢၤဘၣ်. ဘၣ်ဆၣ် ဖိသၣ်အိၣ်ဖျဲၣ်ထီၣ်မ့ၢ်ဝံၤန့ၣ် နတဲတၢ်ကသ့ထီၣ်က့ၤလီၤ.’
စီၤစဃၤရံအိၣ်ဝဲလၢ ယွၤအတၢ်လုၢ်ဟံၣ်ပူၤဖးယံာ်အဃိ ဖဲအဝဲဟဲက့ၤထီၣ်အခါ ပှၤလၢအိၣ်ခိးအီၤလၢတၢ်ချၢန့ၣ် အဲၣ်ဒိးသ့ၣ်ညါဝဲတၢ်မၤအသး ဒီးစီၤစဃၤရံလီၤ. ဘၣ်ဆၣ် စီၤစဃၤရံတဲတၢ်တသ့ဘၣ်. အဃိ အဝဲဘၣ်နဲၣ်စုနဲၣ်ခီၣ်ဒ်သိး ကတဲတၢ်ဒီးပှၤဂၤအဂီၢ်လီၤ. ဝံၤဒီး ပှၤဂီၢ်မုၢ်တဖၣ်န့ၣ် နၢ်ပၢၢ်ဝဲလၢစီၤစဃၤရံ ဒိးန့ၢ်ဘၣ်တၢ်ကစီၣ်လၢ ကစၢ်ယွၤအအိၣ်တခါလီၤ.
တုၤတၢ်ဆၢကတီၢ်ဘၣ်န့ၣ် နီၢ်အ့းလံၤစါဘ့းဒၢထီၣ်ဒီး အိၣ်ဖျဲၣ်ထီၣ်ဝဲအဖိခွါ ဒ်မူခိၣ်ကလူးတဲဘၣ်အီၤအသိးလီၤ. အတံၤသကိးဒီး အဘူးအတံၢ်တဖၣ်ဟဲကွၢ်ဝဲအဖိလီၤ. အဝဲသ့ၣ်သးခုလၢ နီၢ်အ့းလံၤစါဘ့းအဂီၢ်လီၤ. နီၢ်အ့းလံၤစါဘ့းတဲဝဲလၢ– ‘ဖိသၣ်တဂၤအံၤ ကဘၣ်တၢ်ကိးန့ၢ်အမံၤလၢ စီၤယိၤဟၣ်လီၤ.’ ဘၣ်ဆၣ် ပှၤအဂၤတဖၣ်တဲဝဲလၢ– ‘လၢနဟံၣ်ဖိဃီဖိအကျါန့ၣ် ပှၤကိးန့ၢ်အမံၤလၢ စီၤယိၤဟၣ် တအိၣ်နီတဂၤဘၣ်. ကိးန့ၢ်နဖိခွါအမံၤလၢ စဃၤရံဒ်အပၢ်အမံၤအသိးမီၤ.’ ဘၣ်ဆၣ် စီၤစဃၤရံကွဲးလီၤဝဲအဖိခွါအမံၤလၢ– ‘စီၤယိၤဟၣ်လီၤ.’ ဖဲန့ၣ်အခါ စီၤစဃၤရံတဲထီၣ်တၢ်သ့ဝဲလီၤ. တၢ်ကစီၣ်ဘၣ်ဃးဒီး ဖိသၣ်အဂ့ၢ်န့ၣ် ရၤလီၤအသးသကုၤလၢ ကီၢ်ယူဒၤ ဒီးပှၤဂီၢ်မုၢ်တဖၣ်ဆိကမိၣ်ဝဲလၢ– ‘ဖိသၣ်အံၤမ့ၢ်ဒိၣ်ထီၣ်န့ၣ် ကမၤဝဲတၢ်မနုၤလဲၣ်.’
စီၤစဃၤရံ လၢပှဲၤထီၣ်ဒီး ယွၤအသးစီဆှံ ဒီးတဲဝဲလၢ– ‘မ်ယဟိဝၤယွၤဘၣ်တၢ် စံးထီၣ်ပတြၢၤအီၤတက့ၢ်. ကစၢ်ယွၤအၢၣ်လီၤအီလီၤတၢ်ဒီး စီၤအၤဘြၤဟၣ်လၢ အကဆှၢလီၤ ပှၤအုၣ်က့ၤခီၣ်က့ၤတၢ်တဂၤ လၢအမ့ၢ်မ့းၡံအၤလီၤ. အဝဲကမၤပူၤဖျဲးပှၤလီၤ. မ့မ့ၢ်စီၤယိၤဟၣ်န့ၣ် ကကဲထီၣ်ဝဲဝံတဂၤ လၢအကကတဲာ်ကတီၤန့ၢ်ဝဲ မ့းၡံအၤအကျဲန့ၣ်လီၤ.’
တၢ်လီၤလးဟဲကဲထီၣ်အသး ဒီးနီၢ်အ့းလံၤစါဘ့းအဘူးအတံၢ် နီၢ်မၤရံစ့ၢ်ကီးလီၤ. ဘၣ်ဃးဒီးတၢ်ဂ့ၢ်တခါအံၤန့ၣ် ပကမၤလိအါထီၣ်ဘၣ်လၢ တၢ်မၤလိလၢခံတခါအပူၤလီၤ.
“တၢ်အံၤတသ့ဘၣ်လၢ ပှၤကညီဘၣ်. မ့မ့ၢ်ယွၤန့ၣ် သ့တၢ်လၢာ်လီၤ.”—မးသဲ ၁၉:၂၆
တၢ်ဂ့ၤအဂၤလၢ နကဘၣ်သး
တၢ်မၤလိလၢလံာ်စီဆှံအပူၤ
စီၤယိၤဟၣ်ကတဲာ်ကတီၤဝဲကျဲ
စီၤယိၤဟၣ်ဒိၣ်ထီၣ်န့ၣ် ကဲထီၣ်ဝဲဝံတဂၤလီၤ. အဝဲသိၣ်လိဝဲလၢ မ့းၡံအၤကဟဲအဂ့ၢ်လီၤ. ဘၣ်ဃးဒီးစီၤယိၤဟၣ်အတၢ်ကစီၣ်န့ၣ် ပှၤထံၣ်ဝဲဒ်လဲၣ်.
