Vioka 400 za mvu tuka e yaka ya Yerusaleme yatungulwilwa, vakala ye nganga mosi wakala ye nkumbu a Zakariya yo nkaz’andi Elisabete bazingilanga lukufi ye mbanza. Mvu miayingi miavioka tuka basompanena, kansi ke bawutanga ko. Lumbu kimosi, vava Zakariya kayokanga ndumbu muna tempelo, wamona mbasi Ngambiele. Zakariya wamona wonga, kansi Ngambiele wamvovesa vo: ‘Kumoni wonga ko. Nsangu zambote itwasidi zitukidi kwa Yave. O nkaz’aku Elisabete owuta mwan’a yakala, okumvana e nkumbu a Yoane. Yave osolele Yoane mu lungisa salu kimosi kiamfunu.’ Zakariya wayuvula vo: ‘Aweyi ndenda kwikidila mu mvovo miaku? Omono yo nkaz’ame tununini kala, ke tulendi diaka wuta ko.’ Ngambiele wavova vo: ‘Nzambi untumini ngiza kusamunwina e nsangu zazi. Kansi, wau vo kunkwikidi ko, baba okala yamuna lumbu o mwana kewutuka.’

Zakariya ola zayingi kakala muna tempelo, nswaswani ye lumbu yankaka. Muna kuma kiaki, vava kavaika, wantu ana bamvingilanga kuna mbazi bazola zaya kana nkia diambu dibwidi. Zakariya kalenda vova ko. Sinsu kaka kavanganga muna moko. I bosi, o nkangu wabakula vo Zakariya nsangu katambwidi zitukidi kwa Nzambi.

Kuna kwalanda, Elisabete wayimita yo wuta mwan’a yakala nze una mbasi kavova. Akundi ye yitu yandi bayiza tala o mwana. Kiese kikilu bamona mu kuma kiandi. Elisabete wavova vo: ‘E nkumbu andi Yoane.’ Bavova vo: ‘Ke mosi ko muna yitu yaku una ye nkumbu a Yoane. Umvana nkumbu a Zakariya, nkumbu a se diandi.’ Kansi, Zakariya wasoneka vo: ‘Yoane i nkumbu andi.’ Vana vau, Zakariya oyantikidi vova diaka. E nsangu mu kuma kia mwana zamwangana muna Yuda yawonso. Wantu bakiyuvulanga vo: ‘O mwana ndioyo nkia mpil’a muntu kekala vava kekituka se mbuta?’

 I bosi, Zakariya wazala yo mwand’avelela. Wavova vo: ‘Yambula vo Yave kakembelwa, ona wasia nsilu kwa Abarayama vo otwika mvuluzi, i sia vo Masia, mu kutuvuluza. Yoane ngunza kekala, okubika e nzila mu kuma kia Masia.’

Diambu diamfunu diabwila mpe Maria wa yitu kia Elezabete. Tuzaya e diambu diadi muna kapu kilanda.