TUTO 68
Elizabeta Uba ni Mbututu
Hamulaho wa lilimo zefitelela 400 kuzwa fo ayahelwa sinca mamota a Jerusalema, muprisita wa libizo la Zakaria ni musalaa hae Elizabeta, nebapila bukaufi ni muleneñi wa Jerusalema. Nese banyalani ka lilimo zeñata kono nebasina bana. Zazi leliñwi Zakaria inze afa insense mwa tempele mwa sibaka sesikenile, lingeloi Gabriele lato bonahala ku yena. Zakaria naasabile hahulu, kono lingeloi Gabriele lali ku yena: ‘Usike wasaba. Nikutiselize taba yende yezwa ku Jehova. Musalaa hao Elizabeta ukaba ni mwana wamushimani, mi libizo lahae ikaba Joani. Jehova uketile Joani kuli aeze musebezi oipitezi wa butokwa.’ Zakaria abuza ali: ‘Nikona kulumela cwañi zeubulela? Na ni musalaa ka selusupezi hahulu mi halukoni kuba ni mwana.’ Gabriele ali ku yena: ‘Nilumilwe ki Mulimu kuto kutaluseza taba ye. Kono bakeñisa kuli hausika lumela zeni kubulelezi, ukaba simumu kufitela mbututu apepwa.’
Zakaria aina mwa sibaka sesikenile ka nako yetelele kufita mwanaaezezanga kamita. Kacwalo hanaazwile fande, batu neba mulibelezi fande kuli bazibe zeezahezi ku yena. Zakaria naasakoni kubulela. Naakona feela kubulela ka kuitusisa liponiso za mazoho. Batu balemuha kuli Zakaria naaamuhezi lushango kuzwelela ku Mulimu.
Hamulaho wa nako, Elizabeta aitwala, mi apepa mwana wamushimani, sina feela mone libulelezi lingeloi. Balikani bahae ni bahabo yena bataha kuto bona mbututu. Nebatabile ni yena. Elizabeta kihaa li: ‘Ukabizwa Joani.’ Batu bali: ‘Mwa lubasi lwamina hakuna yanani libizo la Joani. Mumubeye libizo la ndatahe, yena Zakaria.’ Kono Zakaria añola fafasi kuli: ‘Joani ki lona libizo lahae.’ Kuzwa feela honafo, Zakaria akala kubulela hape! Likande ka za mbututu lahasanela mwa Judea kaufela, mi batu baipulelisa kuli: ‘Mwanana yo hakahula ukaba mutu yacwañi?’
Cwale Zakaria atala moya okenile. Apolofita kuli: ‘Haike Jehova alumbekwe. Naasepisize Abrahama kuli naaka luma mupilisi, yena Mesia, kuli ato lupilisa. Joani ukaba mupolofita, mi ukalukisa nzila ya Mesia.’
Kwaezahala nto yende ku mwanaa habo Elizabeta yena Maria. Lukanyakisisa ka za taba yeo mwa tuto yetatama.
“Kwa batu taba yeo haikonahali, kono ku Mulimu lika kaufela zakonahala.”—Mateu 19:26
Hape Mwendi Mwakona Kutabela Litaba Ze
ZEMUKONA KUITUTA MWA BIBELE
Joani Ulukisa Nzila
Joani wahula mi uba Mupolofita. Uluta batu kuli Mesia wataha. Batu baezañi habautwa lushango lwahae?
JESU KI YENA NZILA, NITI, NI BUPILO
Litaba Zepeli Zezwa ku Mulimu
Lingeloi Gabriele nelifitisize litaba zeneli taata kulilumela.
JESU KI YENA NZILA, NITI, NI BUPILO
Mutu Yakalukisa Nzila Wapepwa
Zakaria asakalisa feela kubulela hape ka makazo, upolofita taba ya butokwa.
