Higni mokalo 400 bang’ ka ne osetiek ger ohinga mag Jerusalem, jadolo moro ma nyinge Zekaria nodak but Jerusalem ka en gi Elizabeth chiege. Ne gisedak kanyachiel kuom higni mang’eny, to ne pok ginyuolo nyithindo. Chieng’ moro ka ne Zekaria wang’o ubani e i hekalu, malaika ma nyinge Gabriel ne obiro ire. Luoro nomako Zekaria, kata kamano, Gabriel ne onyise kama: ‘Kik iluor. Akeloni wach maber mowuok kuom Jehova. Elizabeth chiegi biro nyuolo nyathi ma wuoyi, to ibiro chake ni Johana. Jehova oseyiero Johana mondo obi otim tich moro makende.’ Zekaria ne openjo niya: ‘Ere kaka anyalo yie gi wechegi? Sani wati ma ok wanyal nyuol.’ Gabriel nowachone niya: ‘Nyasaye e ma oora mondo anyisi wechegi. To nikech in gi kiawa, ibiro bedo momo nyaka chop chieng’ ma ibiro nyuol nyathino.’

Zekaria ne obudho e i hekalu moloyo odiechienge mamoko. Ka ne owuok oko, joma ne ni kanyo ne openje gima notimorene. Zekaria ne ok nyal wuoyo. Nonyalo mana timo ranyisi moko gi lwetene mondo ji otem winjo gik ma nowacho. Ka ji ne oneno mano, ne gifwenyo ni nyaka bed ni Zekaria ne oyudo ote moro mowuok kuom Nyasaye.

Bang’ dweche moko, Elizabeth ne omako ich mi bang’e onyuolo nyathi ma wuoyi mana kaka malaika mar Jehova ne osewacho. Osiepe Elizabeth gi wedene ne obiro neno nyathino. Ne gimor ahinya gi gima notimore ne Elizabeth. Elizabeth nowacho kama: ‘Nying nyathini en Johana.’ To ne ginyise ni: ‘Onge ng’ato ang’ata e anyuolau miluongo ni Johana. Miye nying Zekaria wuon-gi.’ Kata kamano, Zekaria ne ondiko e bao moro niya: ‘Nyathino nyinge Johana.’ Gikanyono, Zekaria ne ochako wuoyo kendo! Wach nyathino ne olandore e Judea duto, kendo ji ne wuoro ahinya. Kendo ne gipenjore ni: ‘Yawa, nyathini biro bedo ng’ama nade kosebet maduong’?’

Eka roho mar Nyasaye ne opong’o Zekaria, mi ne okoro wach kama: ‘Jehova mondo oyud pak. Ne osingo ne  Ibrahim ni ne odhi oro jawar ma en Mesia mondo oreswa. Johana biro bedo janabi, kendo obiro iko ne Mesia yo.’

Nitie gimoro makende ma notimore ne wat Elizabeth miluongo ni Maria. We wanon ane wachno e sula ma luwo.