Zacarías tbʼi jun pal, atzunte t-xuʼjil, Elisabet tbʼi, ex in che anqʼintoq ttxlaj Jerusalén. Otoq tzikʼ mas te 400 abʼqʼi atxix tej kybʼaj bʼinchaʼn juntl maj tmuro Jerusalén. Otoq tzikʼ nim ambʼil kykubʼlen mojeʼ Zacarías tukʼil Elisabet, noqtzun tuʼnj, mintiʼ otoq tzaj jun kykʼwaʼl. Jun qʼij, tej in kubʼtoq tpatin, mo tpoqen, Zacarías incienso toj tja Dios, kubʼ tyekʼin tibʼ anjel Gabriel twitz. Tzaj xobʼ Zacarías ex tuʼntzunju xi tqʼamaʼn Gabriel te: «Miʼn xobʼa. At tbʼanel tqanil tuʼn Jehová. Ok tzul itzʼj jun tal Elisabet, aju t-xuʼjila, ex kʼokel tqʼoʼna tbʼi te Juan. Ma jaw tjyoʼn Jehová Juan tuʼn tbʼant jun tbʼanel aqʼuntl tuʼn». Xi tqanin Zacarías te: «¿Tzeʼn jaku tzʼel nnikʼe tiʼj qa ax tok aju in tzaj tqʼamaʼna? Tuʼnju ma qo tijene tukʼil nxuʼjile tuʼn ttzaj jun qkʼwaʼle». Xi ttzaqʼweʼn Gabriel te: «A Dios ma tzaj samante weye tuʼn t-xi nqʼoʼne tbʼanel tqanil lu teya. Noqtzun tuʼnj, tuʼnju mintiʼ sok qeʼ tkʼuʼja tiʼjju xi nqʼamaʼne teya, mlay bʼanttl tyolina ajxi tul itzʼj tkʼwaʼla».

Kyaj ten Zacarías mas ambʼil toj tja Dios twitzju in kyaj ten. Tej tetz, aʼyeju xjal in che yontoq twitz ja, kyajtoq tuʼn tel kynikʼ tiʼj tiʼ otoq bʼaj. Noqtzun tuʼnj, mintiʼtoq in bʼant tyolin Zacarías, oʼkxtoq in yolin tukʼil tqʼabʼ. Tuʼntzunju, el kynikʼ xjal tiʼj qa otoq tzaj tqʼoʼn Dios jun tqanil te.

Tej tbʼet ambʼil, ok ten tal Elisabet ex ul itzʼj jun tal tqʼa, ik tzeʼn otoq tzaj tqʼamaʼn anjel. E ul qe tamiw ex qe toj tja Elisabet ojtzqilte tal neʼẍ, ex e jaw tzalaj tiʼj. Tqʼama Elisabet jlu: «Juan tbʼi kʼokel». Tzaj kytzaqʼweʼn: «Mix aʼl jun toj tjaya ik tbʼi ik tzeʼn jlu. Maslo bʼaʼn tuʼn tok tbʼi te Zacarías ik tzeʼn tbʼi ttat». Noqtzun tuʼnj, kubʼ ttzʼibʼin Zacarías jlu: «Juan tbʼi kʼokel». Toj ambʼil aju, bʼant tyolen Zacarías juntl maj. Kykyaqil xjal te tnam Judea ok kybʼiʼn tqanil tiʼj tal neʼẍ ex in kubʼtoq kyxjelin xjal jlu: «¿Tiʼtzulo kbʼantel tuʼn kʼwaʼl lu aj tchʼiy?».

Noj toj tanmi Zacarías tuʼn xewbʼaj xjan ex yolin tiʼj jun yol kyaj qʼamaʼn: «¡Qnimsanktz tbʼi Qman Jehová! Tzaj  ttziyen te Abrahán tuʼn ttzaj tsamaʼn jun kolil qiʼj, aju Mesías, tuʼn qklet tuʼn. Ex kʼokel Juan te jun tsanjel Dios aju kbʼel tbʼinchaʼn tbʼe Mesías».

Ax ikx, ikʼ jun tiʼ tbʼanelxix tiʼj jun toj tja Elisabet aju María tbʼi. Ok qo xnaqʼtzal tiʼj jlu toj juntl xnaqʼtzbʼil.