Lino papisile imyaka ukucila pali 400 kufuma pano yakuulile cipya cipya iviumba ivya musumba uwa Yelusalemu, simapepo uwi zina lyakuti Zakaliya na Elizabeti umuci wakwe, iikalanga umupiipi nu musumba uu. Papisile imyaka iingi kufuma pano yatwaline nomba yatakwetipo umwana ali wensi. Wanda umwi lino Zakaliya wapeelanga ivinunkile umu ncende iya muzilo, malaika Gabilieli walolike kuli aliwe. Zakaliya uvwile intete, nomba malaika wamuneenyile ati: ‘Utuvwa intete. Inkuletela ilyasi lisuma kufuma kuli Leza. Elizabeti umuci wako, alakwata umwana umonsi ni zina lyakwe alaya a Yoani. Yeova wasoolola Yoani kuti akaombe umulimo uiyele.’ Zakaliya uzizye ati: ‘Uzye ningakutaila uli? Mamane nani itukota tutanga tukwate umwana.’ Gabilieli nawe waswike ati: ‘Leza atantuma ukuti nize nkuneene ilyasi lii. Nomba pa mulandu wakuti wakana ukuntaila, utalatala uvwange ukufikila lino umwana alavyalwa.’

Zakaliya waleengiile umwa muzilo kucila vino wacitanga lyonsi. Fwandi lino wafumile, wazanyile antu yakumulolela kuti yamanye ivyativicitika. Zakaliya atalandanga. Waomvyanga sile iminwe pa kuvwanga. Lyene antu ilwike ukuti Zakaliya aatapokelela ilyasi kufuma kuli Leza.

Wakwe vino malaika walanzile, lino papisile insita, Elizabeti wakweti inda nu kukwata umwana umonsi. Ivyuza na ya lupwa yaile umu kulola umwana. Nupya yatemilwe sana. Elizabeti walanzile ati: ‘Tumamutemela izina ilyakuti Yoani.’ Nayo yatiile: ‘Umu lupwa lwinu mutaya uwakwata izina ilyakuti Yoani. Mumupeele izina lyakwe isi ilyakuti Zakaliya.’ Nomba Zakaliya walemvile pa nsi ati: ‘Izina lyakwe a Yoani.’ Lilyo kwene sile, Zakaliya watandike ukuvwanga. Ilyasi pa mwana wii lyasalangine umu Yudeya monsi, na antu yatandiike ukuzunguka iyati: ‘Uzye umwana wii alaya uli lino alakula?’

 Lyene Zakaliya wapokelile umupasi wa muzilo. Nupya walanzile ati: ‘Lekini Yeova alumbanyiziwe. Walavile Abulahamu ukuti alatuma Mesiya uwa kututuula. Yoani alaya a kasesema nupya alapekanya inzila yakwe Mesiya.’

Icintu na cuze iciiyele cacitike kuli Maliya lupwa wakwe Elizabeti. Leka tulole icintu cico mu cipande icilondelilepo.