Elõñl̦o̦k jãn 400 iiõ tokãlik jãn iien eo kar kajutake wõrwõr eo ilo Jerusalem, ear wõr juon bũrij etan Zekaraia. Erro kõrã eo pãleen etan Elisabet kar jokwe ilo juon jikin epaake Jerusalem. Elõñ de iiõ remootl̦o̦k jãn iien eo erro kar m̦are, bõtab ejjañin wõr nejierro ajri. Juon raan ke Zekaraia ej ajel̦o̦k kein kaijurjur eo ilo Jikin eo Eokkwõjarjar ilo tampel̦ eo, enjel̦ Gebriel ear wal̦o̦kl̦o̦k ñan ippãn. Zekaraia ear lukkuun mijak, ak Gebriel ear ba: ‘Jab mijak. Ewõr juon ennaan em̦m̦an jãn Jeova ij bõktok ñan kwe. Kõrã en̦ pãleem̦, Elisabet, enaaj kal̦otak juon nejimiro l̦addik im enaaj etan in Jon. Em̦õj an Jeova kããlõt Jon bwe en kab kõm̦m̦ane juon jerbal eaorõk.’ Innem Zekaraia ear kajjitõk ippãn im ba: ‘Ewi wãween bwe in maroñ tõmak naan kein am̦? Kõm̦ro kõrã en̦ pãleõ lukkuun rũtto ñan an wõr nejũm̦ro ajri.’ Gebriel ear ba: ‘Anij eo ear jilkintok eõ bwe in lewaj ennaan in. Bõtab kõnke kwõjjab tõmak eõ, kwoban maroñ kõnnaan m̦ae iien el̦otak niñniñ eo nejũm̦.’

Ilo iien in, ear tol̦o̦k an Zekaraia pãd ilowaan Jikin eo Eokkwõjarjar jãn iien ko m̦okta. Kõn men in, ke ej diwõjl̦o̦k, armej ro me rar kõttare nabõj rar kõn̦aan jel̦ã ta eo ear wal̦o̦k. Ak Zekaraia ear jab maroñ kõnnaan. Ear maroñ kõjerbal wõt pein im kõkal̦l̦el̦o̦k ñan er. Innem armej ro rar kile bwe ewõr juon ennaan Zekaraia ear roñ jãn Anij.

Tokãlik, Elisabet ear bõro̦ro im ear kal̦otake l̦adik eo nejin ãinwõt an kar enjel̦ eo ba. Im armej ro nukũn im m̦õttan rar etal im lol̦o̦k niñniñ eo. Rar lukkuun m̦õn̦õn̦õ bwe ewõr nejin Elisabet. Elisabet ear ba: ‘Enaaj etan in Jon.’ Ak rar ba ñane: ‘Ejjel̦o̦k jãn baam̦le n̦e am̦ ej bõk ãt in Jon. Kwõn likũt etan Zekaraia bwe en bõk etan jemãn.’ Ak Zekaraia ear jei l̦o̦k naan kein me rej ba: ‘Jaab, enaaj etan in Jon.’ Ilo iien eo wõt, Zekaraia ear maroñ bar kõnnaan! Armej ro ilo aolepen Judia rar roñ kõn niñniñ eo, im rar kõn̦aan jel̦ã kõn ta ko l̦adik in enaaj kõm̦m̦ane ñe erũtto.

Innem Zekaraia ear jino obrak kõn jetõb kwõjarjar. Ear  kanaan im ba: ‘Nõbar en ilo̦k ñan Jeova. Ear kallim̦ur ñan Ebream bwe Enaaj jilkintok juon rũlo̦mo̦o̦r, Messaia eo, bwe en lo̦mo̦o̦ren kõj. Jon enaaj juon rũkanaan, im enaaj kõpooj ial̦ eo ñan Messaia eo.’

Juon men ekabwilõñlõñ ear bar wal̦o̦k ñan jiroñ eo nukũn Elisabet etan Meri. Jen lale ta eo ear wal̦o̦k ilo katak n̦e tok juon.