B sẽn lebg n me Zerizalɛm lalsã n sa wã yɩɩda yʋʋm 400 masã. Maan-kʋʋd a ye n da be tɩ b boond t’a Zakari, t’a pagã yʋʋr la a Elizabɛte. B sẽn da be tẽng ningã pa zãr ne Zerizalɛm ye. Yʋʋm wʋsg la woto b sẽn kẽ kãadem, la b pa tar biig ye. Daar a ye, a Zakari ra bee wẽnd-doogã zĩ-sõngã pʋgẽ n yõogd wisdu, tɩ malɛk a Gabriyɛll puki. A Zakari yɛɛsa wʋsgo, la a Gabriyɛll yeel-a lame yaa: ‘Da yɛɛs ye. A Zeova tʋma maam tɩ m wa togs-f koe-noogo. Fo pag a Elizabɛt na n doga bi-ribla, la f na n pʋd-a lame t’a Zã. A Zeova na n yãk-a lame t’a tʋm tʋʋm-kãsenga.’ A Zakari yeela malɛkã yaa: ‘Maam ne m pagã tõe n le rog biiga? Tõnd kʋʋlame.’ La a Gabriyɛll yeelame: ‘Yaa Wẽnnaam n tʋm maam tɩ m wa togs foo. La fo sẽn pa tẽ wã yĩnga, fo na n lebga muk hal n tãag biigã rogem.’

A Zakari ra kaoosdame n pa yit ye. A sẽn wa n yi wã, sẽn da be-b yɩng n gũudẽ wã baoome n na n bãng bũmb ning sẽn maan pʋgẽ wã. La a Zakari ra lebga muka, n bilsd ne a nusã bala. Rẽnd nebã bãngame tɩ Wẽnnaam taas-a-la koɛɛga.

A Elizabɛt wa n dɩka pʋga, n dog bi-ribl wa malɛkã sẽn da yeelã. A zo-rãmbã la a buudã neb wa n gesa biigã. B sũy yɩɩ noog wʋsgo. A Elizabɛt yeelame: ‘D na n pʋda biigã yʋʋr t’a Zã.’ La nebã yeelame: ‘Yãmb buudã pʋgẽ, ned ka pʋd a biig t’a Zã ye. Pʋd-a t’a Zakari, wa a baaba.’ La a Zakari gʋlsame yaa: ‘Biigã yʋʋr la a Zã.’ Wakat kãng bala, a Zakari le sɩnga goama. Zida tẽngã pʋgẽ, nebã fãa ra gomda biigã yelle, la b sokd b mens yaa: ‘Bi-kãngã sã n wa lebg bedre, a na n maana bõe?’

Rẽ poore, Wẽnnaam vʋʋsem sõngã kẽe a Zakari, t’a togs a Zã sẽn na n wa maan bũmb ningã. A yeelame: ‘Bɩ a Zeova paam pẽgre. A ra pʋlma  a Abrahaam t’a na n tʋma Mesi t’a wa fãag tõndo. A Zã na n yɩɩ no-rɛɛsa, n maneg sor Mesi wã yĩnga.’

A Elizabɛt ra tara yao t’a yʋʋr la a Maari. Bũmb n maan yẽ me tɩ yaa yel-solemde. D na n yãa rẽ sak ning sẽn pʋgdã pʋgẽ.