Ta̱ Zacarías iin su̱tu̱ kúúra ta ñá síʼíra xi̱naní Elisabet, yatin ñuu Jerusalén xi̱ndoona. Xa̱a̱ ni̱ya̱ʼa 400 ku̱i̱ya̱ ña̱ sa̱ndáʼana nama̱ ña̱ ñuu Jerusalén. Ta̱ Zacarías xíʼin ñá Elisabet xa̱a̱ ku̱a̱ʼá tiempo ti̱ndaʼa̱na, ta kǒo se̱ʼena. Iin ki̱vi̱ ta̱ Zacarías ndíka̱a̱ra níchiʼmára ini templo Ndióxi̱, ta ki̱ta ta̱ ángel Gabriel nu̱úra. Ta̱ Zacarías ni̱yi̱ʼvíníra, soo ta̱ Gabriel ni̱ka̱ʼa̱nra: “Va̱ása yi̱ʼvíún. Íyo iin tu̱ʼun va̱ʼa kúni̱ Jehová kunda̱a̱-iniún. Ñá Elisabet, koo iin se̱ʼeñá, ta̱ loʼo yóʼo kunaníra Juan. Jehová nda̱ka̱xinrara ña̱ keʼéra iin chiñu ndáyáʼviní”. Ta̱ Zacarías ni̱nda̱ka̱tu̱ʼunra: “¿Kǒo xíni̱i̱ á ña̱ ndixa kúú ña̱ káʼún? Na̱ xa̱a̱ chéeva kúúndi̱ ña̱ va̱ʼa koo se̱ʼendi̱”. Ta̱ Gabriel nda̱kuiinra: “Ndióxi̱ chi̱ndaʼá yi̱ʼi̱ ña̱ ka̱ʼi̱n xíʼún. Soo xa̱ʼa ña̱ kǒo níkandíxaún yi̱ʼi̱, va̱ása kivi ka̱ʼún nda̱a̱ ná kaku ta̱ loʼo yóʼo saá kivi ka̱ʼún”.

Ta̱ Zacarías ni̱ku̱a̱chira ini templo. Tá xa̱a̱ ki̱tara, na̱ yiví na̱ ndíta chí ke̱ʼe xi̱kuni̱na kunda̱a̱-inina ndáaña ndo̱ʼora. Soo ta̱ Zacarías va̱ása níkivi ka̱ʼa̱nra, chi ndáa seña kuití va̱ʼa kéʼéra. Ta xíʼin ña̱yóʼo na̱kunda̱a̱-ini na̱ yiví ña̱ ni̱ka̱ʼa̱n Ndióxi̱ xíʼinra.

Ni̱ya̱ʼa tiempo, ñá Elisabet ni̱ke̱e se̱ʼeñá, ta ka̱ku se̱ʼéñá táki̱ʼva ni̱ka̱ʼa̱n ta̱ ángel. Na̱ migo ñá Elisabet xíʼin na̱ veʼeñá ki̱xa̱a̱na nu̱úñá ña̱ kunina ña̱ lée loʼo se̱ʼeñá ta ni̱kusi̱íní-inina xíʼinñá. Ñá Elisabet ni̱ka̱ʼa̱nñá: “Juan kunaníra”. Na̱yóʼo nda̱kuiinna: “Kǒo iin na̱ táʼún naní saá va̱ʼaka tá naní yi̱vara saá kunaníra”. Ta̱ Zacarías ka̱ʼyíra ña̱yóʼo: “Juan kunaníra”. Saá ki̱xaʼá ta̱ Zacarías káʼa̱nra. Iníísaá ñuu na̱kunda̱a̱-inina ña̱ ka̱ku ta̱ loʼo yóʼo, na̱ yiví ndáka̱tu̱ʼun xíʼin miína: “¿Ndáaña keʼé ta̱ loʼo yóʼo tá ná kuaʼnura?”.

Ta̱ Zacarías nda̱kiʼinra ndée Ndióxi̱ ta ni̱ka̱ʼa̱nra ña̱ koo chí nu̱únínu: “Ná ndasakáʼnuyó Jehová.  Chi ni̱ka̱ʼa̱nra xíʼin ta̱ Abrahán ña̱ chindaʼára ta̱ saka̱ku miíyó, ta̱ Mesías. Ta̱ Juan koo iin profeta natúʼun xa̱ʼa ta̱yóʼo”.

Ta iin ñá táʼan ñá Elisabet ñá naní María íyo iin ña̱ ndo̱ʼoñá. Ná kaviyó inka historia ña̱ va̱ʼa kunda̱a̱-iniyó xa̱ʼa ña̱yóʼo.