Mu nima ya miaka 400 tunde ha ku tungulula vivumbe via Yelusalema, sasendote ua lizina Zakaliya na mpueyeni, Elizambeta, va yoyele ku hiehi na mbonge. Tunde ha va li ambatelele mua hitile miaka ya ingi vunoni ka va kele na vana. Tangua limo Zakaliya ua kele na ku lumba vihemba mu hondo ya ku lela mu tembele, kangelo Ngambiele ua mu solokelele. Zakaliya ua vuile vuoma, vunoni Ngambiele ua mu lekele ngueni: ‘Kati uivue vuoma. Nja ku nehela muzimbu ua cili u tunda kuli Yehova. Mpueyove Elizambeta a ka sema muana ua yala kaha lizina leini li ka pua Yoano. Yehova na hangula Yoano ku linga cipanga ca ku lifuila.’ Kaha Zakaliya ua mu hulile ngueni: ‘Vati nji hasa ku tava vi u na handeka? Ange na mpueyange tua kolo cikuma linga tu seme muana.’ Ngambiele ua mu lekele ngueni: ‘Njambi ikeye na nji tumu kuli yove nji ku nehele ou muzimbu. Vunoni mu ku linga ka ua tavele vi nja handeka, ka u ka handeka noho muana na semuka.’

Zakaliya ua kele ntunda ya kama mu hondo ya ku lela ku hiana matangua ose. Omo ua tuhukile, ua uanene vantu va na mu vanandamena ha mbanza, kaha va tondele ku tantekeya via mu solokelele. Vunoni Zakaliya ka hasele ku handeka. Ua handekele lika na mavoko. Kaha vantu va muene ngecize na tambula muzimbu ua ku tunda kuli Njambi.

Mu ku hita ca ntsimbu, Elizambeta ua kele na lizimo, kaha ua semene muana ua yala, ngue mua handekele kangelo. Vusoko na vavusamba veni vezile na ku mona kakeke. Va kele na ndzolela ya kama. Kaha Elizambeta ua handekele ngueni: ‘Lizina lieni li ka pua Yoano.’ Vunoni va mu lekele nguavo: ‘Ka ua kele na kavusoko ua lizina lia Yoano. Mu luke Zakaliya, lizina lia ise.’ Vunoni Zakaliya ua sonekele amo mezi ngueni: ‘Lizina lieni Yoano.’ Ku tunda ha ntsimbu ize vene, Zakaliya ua putukile ku handeka naua! Muzimbu ua kakeke ua lisanduokele mu Yundeya yose, kaha vantu va kele na ku handeka ngecize: ‘Iya a ka pua ou kanike mua ka kola?’

Kaha Zakaliya ua sulile na sipilitu ya ku lela. Ua polofetele ngecize: ‘Sangazialenu Yehova. Ua kulahesele  Avilahama ngecize a ka tuma muovole, Mesiya, a ka tu ovola. Yoano a ka pua kapolofeto, kaha a ka viukisa njila ya Mesiya.’

Kua kele naua viuma vimo via ku lifuila via solokelele Maliya kavusoko ka Elizambeta. Tu ci vi tantekeye mu kapitulu ka na hatako.