Panotoya 400 xiuitl kikualchijchijtoyaj tepamitl ne Jerusalén. Nechka altepetl Jerusalén itstoya se sacerdote tlen motokaxtiyaya Zacarías uan isiua Elisabet. Maske kiuikayayaj miak xiuitl mosenkajtoyaj, amo kinpixtoyaj ininkoneuaj. Se tonali, kema Zacarías kitlatiyaya incienso ipan teokali, monextik iluikaejketl Gabriel. Zacarías tlauel momajmatik, uajka Gabriel kiiljuik: “Amo ximajmaui. Jehová nechiljuik ma nimitsiljuiki se kuali tlamantli. Mosiua Elisabet, kipias se ikone uan inkitokaxtlalisej Juan. Jehová kitlapejpenijtok Juan ma kichiua se ueyi tekitl”. Zacarías kitlajtlanilik: “¿Kenijkatsa nijmatis tlaj nelia tlen tinechiljuia? Nosiua uan na ya tiueuejtixtokej”. Gabriel kiiljuik: “ToTeotsij nechtitlanki ma nimitsyolmelaua ni kuali tlamantli. Uan pampa amo tinechneltokilik, ayokmo tikamanaltis. Peuas sampa tikamanaltis kema tlakatis mokone”.

Zacarías tlauel uejkajki kalijtik ipan teokali. Kema ualkiski, maseualmej katli itstoyaj kalteno kinekiyayaj kimatisej tlake panotoya. Zacarías amo ueliyaya kamanalti, san tlamanextiyaya. Uajka maseualmej kimatkej toTeotsij kiyolmelajtoya se tlamantli.

Teipa, Elisabet konekuik, uan teipa kitlakatiltik se pilkonetsi kej kiijtojtoya nopa iluikaejketl. Ichampoyouaj uan iuampoyouaj Elisabet kiitatoj nopa pilkonetsi, uan tlauel yolpajkej. Elisabet kiniljuik: “Motokaxtis Juan”. Inijuantij kiiljuijkej: “Amo aka tlen mochampoyouaj motokaxtia Juan. Xijtokaxtlali Zacarías, kej itata”. Uajka Zacarías kiijkuilok: “Motokaxtis Juan”. ¡Uan Zacarías sampa pejki kamanalti! Nochi maseualmej ipan Judea kimatkej tlen panotoya, uan motlajtlaniliyayaj: “¿Tlake kichiuas ni konetsi kema moskaltis?”.

Uajka Zacarías kiselik itonal toTeotsij, uan kiijtok se tlajtolpanextili, kiijtok: “¡Ma tijueyichiuakaj Jehová! Ya kiiljuik Abraham kititlaniskia se temakixtijketl, nopa Mesías,  katli techmakixtiskia. Uan Juan elis se tlajtolpanextijketl tlen kikualtlalis Mesías iojui”.

Se iteixmatka Elisabet katli motokaxtiyaya María nojkia kiyolmelajkej se kuali tlamantli. Nopa tikitasej ipan nopa seyok tlamachtili.