Se tiopixkat akin monotsaya Zacarías uan inamik, Elisabet, amo uejka nemiaj itech xolal Jerusalén. Panoua 400 xiujmej achto oksepa kichijchiujkaj tepamit tein kiyoualouaya Jerusalén. Zacarías uan Elisabet uejkaujya monamiktijkaj, sayoj ke amo kinpiayaj konemej. Se tonal, keman Zacarías tapopochuijtoya itech templo kampa kiueyichiuayaj Jiova, ángel Gabriel monextij iixpan. Zacarías motelmoujtij, sayoj ke Gabriel kiluij: “Amo ximoui. Nimitsualkuilia kuali tanauatilmej tein nechiluij Jiova. Monamik, Elisabet, kipiati se okichpil, uan motokaytis Juan. Jiova kiixpejpenak Juan maj kichiua se tekit tein motelneki”. Zacarías kitajtanij: “¿Keniuj uelis nimitsneltokilis? Nonamik uan nejua amo ueli tikpiaj se konetsin porin semi tixiuejkejya”. Gabriel kinankilij: “Dios nechualtitanik maj nimitsnauatiki nejin. Sayoj ke kemej amo tinechneltokilij, amo uelis titajtos hasta satepan ke yolis konetsin”.

Zacarías okachi uejkauak ke achto itech templo. Keman kisak, taltikpakneminij akin mochixtoyaj kalampa kinekiaj kimatiskej toni panoka. Sayoj ke Zacarías amo uelia tajtouaya, sayoj uelia majmasouaya. Yejua ika nochin kiajsikamatkej ke Dios kimatiltijka teisa.

Satepan, Elisabet mokokoxkatalij uan kipiak se okichpiltsin, ijkon kemej kijtojka ángel. Itasojikniuan uan ichankauan Elisabet kiitakoj konetsin uan no yolpakkej. Elisabet kijtoj: “Motokaytis Juan”. Yejuan kinankilijkej: “Nion se mochankauj ijkon monotsa. Okachi kuali xiktokaytikan Zacarías, kemej ipopaj”. Sayoj ke Zacarías kijkuiloj: “Motokaytia Juan”. Ijkuak, Zacarías oksepa uelik tajtoj. Noyampa Judea momatik ke yolka nejon konetsin, uan taltikpakneminij motajtaniayaj: “¿Toni kichiuas nejin konetsin keman ueyias?”.

Ompa Zacarías kiselij yektikatsin espíritu uan kijtoj se taman tein panoskia: “¡Maj tikueyitalikan Jiova! Yejuatsin  motenkauak iuan Abrahán ke kiualtitaniskia se temakixtijkej, Mesías. Uan Juan yeski se tanauatijkej akin kiteixmatiltis ke ualas Mesías”.

María, se ichankauj Elisabet no kipanok se taman kemej nejon. Maj tikitakan itech okse tamachtilis.