CIJIJO 68
Erizabheti Anova no Mwana
Kwakapera makore anokwana 400 mufimbiji jo Jerusarema no japera kuvakwa, mupiri anodanwa Zakaria no mukaji wake Erizabheti vaigara phedo no dhorobha rondhoro. Ivona vakacadha ku makore akawanda, asi avacainga no mwana. Njiku imweni, Zakaria painga aciita mupiro mu ndau yakacena yo temberi, kwakabudirira ngirozi Gabrieri. Zakaria wakathya, asi ngirozi Gabrieri yakati: ‘Zakaria ucathya. Ndiri kuviisa masoko akanaka abva kuna Jehovha. Mukaji wako, Erizabheti, anozobara mwana zve zina rake rinozova Johani. Jehovha wasana Johani kutira basa rinosisira maningi.’ Zakaria wakabvunjisa kuti: ‘Ndingazvizivisa kudini? Mukaji wangu na inini taa vasharuka.’ Ngirozi Gabrieri yakati: ‘Ndatumwa ndi Mwari kuti ndikuviisire masoko aya akanaka. Asi ngo kuti iwewe auzivi kutenda zvandananga, kubvira wari unozoita mbeveve , auzovereketi mbhera mwana abahwe.’
Zakaria wakagara maningi mu ndau yakacena yo mu temberi kupinda cirovejeso. Ngo kudaro paakabuda, vandhu vainga vari kunja vaida kuziva kuti zvicinyi zvainga zvaitika. Asi Zakaria acaikwanisa kuvereketa. Iyena waikwanisa kubhuya ngo nyara basi. Ngo kudaro vandhu vakazwisisa kuti wainga waashira masoko anobva kuna Mwari.
Pa kufamba ko nguva, Erizabheti wakava no mimba zve wobara mwana wo rume inga zvakananga ngirozi. Ukama no zvigarisano vakaviya kovona mwana. Ivona vainga vakadakara maningi ngo ndava yake. Erizabheti wakati: ‘Zina rake rinozova Johani.’ Ivona vakati: ‘Akuna mundhu pa ukama wako anodanwa Johani. Mudurei zina ra babake kuti Zakaria.’ Asi Zakaria wakatara pasi magama okuti: ‘Zina rake ndi Johani.’ Pa nguva yondhoyo, Zakaria wakatanga kuvereketazve! Masoko ngo pamusoro po mwana akaparajika mu Judha mwese zve vandhu vakatanga kuneseka veciti: ‘Anozoita wakadini mwana uu?’
Zakaria wakazara no mujimu mucena. Wakatanga kuphorofeta eciti: ‘Ngaakujwe Jehovha. Iyena wakagondisa Abhirahama kuti waizomutumira Mesia kuti atiponese. Johani anozova muporofita zve anozonasirira gwanja kuitira kuviya kwa Mesia.’
Pana ciro cimweni cinoshamaisa cakaitikavo kuna Maria hambzaji ya Erizabheti. Ngatendenyi kupopora ngo pamusoro pazvo pa cipauko cinotevera.
“Abzikwanisiki ku mundhu, kaveta kuna Mwari bzese bzinokwanisika”—Mateu 19:26
Zvimweni Zvamungadakarira nga Izvi:
ZVIJIJO ZVAUNGAWANA MU BHAIBHERI
Johani Anonasirira Gwanja
Paanokura Johani anova muporofeti. Iyena anojijisa kuti Mesia arikuviya. Vandhu vondhovo vakazwa kudini zvaijijiswaro?
JESU—I GWANJA, I COKWADI NO UPENYU
Masoko Maviri Anobva kuna Mwari
Ngirozi Gabhirieri inoviisa masoko ainesa kutenda.
JESU—I GWANJA, I COKWADI NO UPENYU
Kubahwa ko Waizonasirira Gwanja
Zakaria paakandotanga kuvereketa ngo mushamaiso, wakananga uphorofita hunosisira maningi.
