Omimvo 400 konima sho omadhingililokuma gaJerusalem ga tungululwa, omuyambi Sakaria nomukadhi, Elisabet, oya li haya zi popepi noshilando shoka. Oya kala ya hokana uule womimvo odhindji, ihe kaya li ye na aanona. Esiku limwe manga Sakaria e li muuyapukielela wotempeli ta ningi omatsinino, omuyengeli Gabriel okwe ya kuye. Sakaria okwa li a tila, ihe Gabriel okwa ti: ‘Ino tila. Onde ku etela onkundana ombwanawa ya za kuJehova. Omukulukadhi gwoye Elisabet ota ka vala okanona okamati notaka ka lukwa Johannes. Jehova okwa hogolola Johannes a ka longe iilonga yi ikalekelwa.’ Sakaria okwa pula a ti: ‘Shika otandi shi itaale ngiini? Ngame nomukulukadhi gwandje otwa kulupa, itatu vulu okumona okanona.’ Gabriel okwa ti: ‘Kalunga oye a tumu ndje ndi ku lombwele onkundana ndjika. Ihe molwaashoka ino itaala ndje, oto ka kala itoo popi sigo okanona ka valwa.’

Sakaria motempeli okwa kala mo ethimbo ele unene. Sho a zi mo, aantu mboka ya tegelela pondje, oya li ya hala okuuva kutya oshike sha ningwa po. Sakaria ka li ta vulu okupopya. Okwa li owala ta ningi omandhindhiliko niikaha ye. Aantu oya mono kutya okwa pewa onkundana ya za kuKalunga.

Konima yethimbo, Elisabet okwa ningi omusimba e ta mono okanona kokamati, ngaashi naanaa omuyengeli a ti. Aashiinda naanezimo ye oye ya okutala okanona. Oya li ya nyanyukwa pamwe naye. Elisabet okwa ti: ‘Edhina lyako oJohannes.’ Aantu oya ti: ‘Mezimo lyeni kamu na nando omuntu e na edhina Johannes. Ka lukila he Sakaria.’ Ihe Sakaria okwa nyola pokapelende oohapu ndhika: ‘Edhina lyako oJohannes.’ Opo tuu mpoka okwa tameke okupopya ishewe. Kehe gumwe muJudea oku uvu kombinga yokanona hoka, naantu oya kala tayi ipula taya ti: ‘Okanona haka otaka ka kala ka tya ngiini ngele ka koko?’

Manga tayi ipula ngawo, Sakaria oku udha ombepo ondjapuki nokwa hunganeke a ti: ‘Jehova na hambelelwe!  Oku uvanekele Abraham kutya ota ka tuma omuhupithi, Mesiasa, e tu hupithe. Johannes ota ka kala omuhunganeki nota ka longekidhila Mesiasa ondjila.’

Maria, omukwanezimo gwaElisabet, naye okwa ningilwa oshinima shi ikalekelwa. Natu leshe kombinga yasho moshitopolwa tashi landula.