Opanok 400 xiuitl ika okiyektlalijkej itepanuan Jerusalén. Se teopixki itoka katka Zacarías niman isiuauj Elisabet, chantiyaj inisiuj ueyikalpan. Yejuamej ikipiayaj miyek xiuitl ika yononamiktijkaj, san ika, xkipiayaj inkoneuan. Se tonajli, ijkuak Zacarías kipojkixtiaya tlen ajuiyak ijtik Santo tlen onkatka ipan teopan, iluikaktekitketl Gabriel okinojtiti. Zacarías melak onomojti, san ika, Gabriel okijli: “Maka xmomojti. Nimitsuajkuilia kuajli tlajtoltin tlen ualeua itech Jehová. Mosiuauj, Elisabet, kipiyas se ikonetsin niman itoka yes Juan. Jehová yokitlapejpeni makichiua se tekitl tlen melak ueyi kijtosneki”. Zacarías okitlajtolti: “¿Kenon uelis nikneltokas? Nejua niman nosiuauj yotiueuentsintiakej, xok uelis tikpiyaskej se tokoneuj”. Gabriel okijli: “ToTajtsin onechajtitlan manimitsijliki yejuin kuajli tlajtoltin. San ika, pampa xotinechneltokak, xuelis titlajtos hasta ijkuak uajnemis konetsintli”.

Zacarías ouejkauj ijtik santuario xijkon ken okseki tonajli. Ijkuak ouajkis, tlaltikpakchanejkej akin kichiatoyaj kinekiyaj kimatiskej tlenon opanok. Zacarías xueliya tlajtouaya. San kiteijliaya ika señas tlen kinekiya kijtos. Kuakon tlaltikpakchanejkej okimatkej ika okiseli tlajtojli tlen ualeuaya itech toTajtsin.

Sakin, Elisabet okoneuajtiak niman okipix se konetsintli, ijkon ken iluikaktekitketl okijtoka. Akin imiuan nouikayaj niman ichanejkauan okitatoj konetsintli niman melak pakiyaj ipampa. Elisabet okijto: “Itoka yes Juan”. Yejuamej okijtokej: “Xtikpiya nion se mochanejkauj itoka Juan. Manotokayoti Zacarías, ken itaj”. San ika, Zacarías okijkuilo: “Itoka Juan”. Ijkuakon, ¡Zacarías oksejpa ouel otlajto! Tlen opanok itech konetsintli onomat ipan nochi Judea niman tlaltikpakchanejkej onotlajtoltijkej: “¿Tlenon kichiuas yejuin konetl ijkuak noskaltis?”.

Kuakon Zacarías okiseli iespíritu santo toTajtsin. Yejua okijto se teotlajtojli: “Manoueyichiua Jehová. Yejua okijli  Abrahán ika kuajtitlaniskia se temakixtijketl, Mesías, akin techmakixtis. Niman Juan yes se teotlajtoketl akin tenojnotsas itech Mesías”.

Noijki, se ichanejkauj Elisabet, akin itoka katka María, itlaj ipan onochiuj tlen temojkatlachialti. Tikitaskej yejuin ipan okse capítulo.