Go be go na le moperisita yo mongwe yo a bitšwago Sakaria gomme a na le mosadi yo a bitšwago Elisabetha. Ba be ba dula kgauswi le motse wa Jerusalema. Ka nako yeo, go be go fetile mengwaga ya ka godimo ga e 400 maboto a motse wa Jerusalema a agilwe leswa. Ba be ba na le mengwaga e mentši ba nyalane eupša ba se na bana. Ka letšatši le lengwe ge Sakaria a direla Jehofa diorelo ka tempeleng, morongwa Gabariele o ile a tšwelela go yena. Sakaria o ile a tšhoga, eupša Gabariele a re go yena: ‘O se ke wa tšhoga. Ke go tlišeditše ditaba tše dibotse tše di tšwago go Jehofa. Mosadi wa gago e lego Elisabetha o tlo ba le ngwana wa mošemane gomme leina la gagwe e tla ba Johane. Jehofa o tlo nea Johane mošomo o kgethegilego.’ Ke moka Sakaria a re: ‘Ga ke go tshepe. Nna le mosadi wa ka re tšofetše kudu gore re ka ba le ngwana.’ Gabariele a re: ‘Ke romilwe ke Modimo gore ke tlo go botša ditaba tše. Eupša ka ge o se wa ntshepa, o tlo ba semumu go fihlela ngwana yoo a belegwa.’

Sakaria o ile a dula ka tempeleng matšatši a mantši kudu. Mafelelong ge a etšwa, batho bao ba bego ba eme ka ntle ba ile ba nyaka go tseba seo se mo diragaletšego. Eupša Sakaria o be a sa kgone go bolela. O be a bolela le bona ka matsogo feela. Ka gona batho bao ba bona gore Modimo o boletše le yena.

Ge nako e dutše e eya, Elisabetha o ile a ima gomme a belega ngwana wa mošemane, bjalo ka ge morongwa Gabariele a boletše. Bagwera ba Elisabetha le ba leloko ba ile ba tla go tlo bona lesea leo. Ba ile ba thaba le yena. Elisabetha o ile a re: ‘Leina la gagwe e tla ba Johane.’ Eupša bona ba re: ‘Ga go na motho yo a bitšwago Johane bathong ba geno. Mmitše Sakaria, e lego leina la tatagwe.’ Ke moka Sakaria a ba ngwalela leina la lesea leo letlapeng, a ngwala gore: ‘Leina la gagwe ke Johane.’ Ka yona nako yeo, Sakaria a thoma go bolela. Batho ba Judea ka moka ba ile ba kwa ka go belegwa ga lesea leo, gomme ba ipotšiša ba re: ‘Ngwana yo e tlo ba eng ge a godile?’

Ke moka Sakaria a tlala moya o mokgethwa, gomme a bolela seo ngwana yoo a bego a tlo se dira ge a godile. A re: ‘A go  tumišwe Jehofa, ka ge a ile a tshepiša Aborahama gore O tlo romela mophološi, yena Mesia, gore a tlo re hlakodiša. Johane e tlo ba moporofeta, gomme o tlo bulela Mesia tsela.’

Motswala wa Elisabetha e lego Maria le yena o ile a diragalelwa ke selo se se kgethegilego. A re ithute ka sona kgaolong e latelago.