Palambele omanima 400 tunde apa ovimato vio Jelusalei viatungwa, omunene nakwa umwe utiwa o Sakaliya nomukai wae Elisabete, ankho vakala popepi nepunda-umbo olio. Tunde apa velinepa ankho palambale omanima omanyingi, mahi ankho vetupu omona. Nthiki imwe putyina Sakaliya alinga otyilikutila mondyuo ya Huku, oandyu Gabiliyeli aiya. Sakaliya atili unene owoma, mahi oandyu Gabiliyeli aimupopila okuti: ‘Uhatile owoma. Ame nekuetela onondaka onongwa mbatunda ku Jeova. Omukai wove Elisabete makala nomona malukwa okuti o João. Jeova waholovona João opo akale notyilinga tyimwe tyelikalela.’ Sakaliya apulu okuti: ‘Oñgeni mandyitavela etyi wapopia? Ame nomukai wange tuakulupa unene pala okukala nomona.’ Oandyu aiti: Ame natumwa na Huku opo ndyikupopile onondaka ombu. Mahi mokonda kuetavelele etyi napopia mokala ompholo alo omona atyitwa.’

Sakaliya akala ehimbwe mondyuo ya Huku tyipona etyi ehole ale okukala-mo. Etyi alupuka-mo ovanthu ankho vekahi nokumukevela pondye opo vanoñgonoka oityi tyaenda-po. Mahi Sakaliya ankho ketyivili okupopia. Mahi ankho uviva vala omankhanya. Ovanthu avaimbuka okuti Sakaliya watambula onondaka mbatunda ku Huku.

Konyima, ngetyi oandyu yapopile Elisabete akala omulemi, akutula omona. Omapanga ae nombunga aveya okutala olukembe. Ankho vahambukwa unene. Elisabete apopi okuti: ‘Enyina liae o João.’ Ovanthu avapopi okuti: ‘Petupu omunthu mombunga yenyi wiihanwa okuti João. Mulukei okuti o Sakaliya, enyina lia tate yae.’ Mahi Sakaliya ahoneka pokavai okuti: ‘Enyina liae o João.’ Okuhimbikila opo Sakaliya ehimbika okupopia! Ovanthu aveho mo Judeia avanoñgonoka ovipuka ovio, avehimbika okulipula okuti: ‘Tyina omona ou amekulu makala omunthu patyi?’

Sakaliya akala tyeyula ospilitu sandu. Iya apopi  okuti: ‘Jeova ahilivikwe. Walaele Abraiau okuti matumu Mesiya, opo etuyovole. João makala omuuli iya maikula ondyila ya Mesiya.’

Tupu Maliya ombunga ya Elisabete nae wakalele nehuviso limwe. Ehuviso patyi? Matutyitale mokapitulu makalandula-ko.