Bwanyima y’emyaka erikurenga omuri 400 engo za Yerusaalemu ziherize kugaruka kwombekwa, omunyamurwa Zekaria n’omukazi we, Elizaabeesi, bakaba nibatuura haihi n’orurembo orwo. Bakaba bamazire emyaka mingi omu bushwere kwonka bataine mwana. Eizooba rimwe Zekaria ku yaabaire naayoterera obubaane omuri hekalu, maraika Gaburieli akamubonekyera. Zekaria akatiina, kwonka Gaburieli akamugira ati: ‘Otatiina. Naakureetera amakuru marungi kuruga ahari Yehova. Omukazi waawe, Elizaabeesi, naija kuzaara omwana w’omwojo kandi eiziina rye aryayetwa Yohaana. Yehova akaba naija kutoorana Yohaana kukora omurimo gw’omutaano.’ Zekaria akamubuuza ati: ‘Ekyo nimbaasa kukiikiriza nta? Nyowe n’omukazi wangye tukuzire munonga titurikubaasa kuzaara omwana.’ Gaburieli akamugira ati: ‘Ntumirwe Ruhanga kukugambira ebigambo ebi ebirungi. Kwonka ahabw’okugira ngu tiwaikiriza ebi naakugambira, torikwija kugamba kuhitsya obu omwana arizaarwa.’

Zekaria akamara obwire buraingwa omu hekalu okukira obu yaabaire amaramu butoosha. Bwanyima ku yaarugiremu, abantu abaabaire bari aheeru bategyereize bakaba nibenda kumanya ekyabaho. Zekaria akaba atarikubaasa kugamba. Akaba naabaasa kukora obumanyiso n’engaro ze kwonka. Abantu bakamanya ngu Zekaria yaatunga obutumwa kuruga ahari Ruhanga.

Omu bunaku obwo, Elizaabeesi akagira enda kandi yaazaara omwana w’omwojo, nk’oku maraika yaabaire amugambiire. Banywani be n’abanyabuzaare bakaija kureeba omwana. Bakashemererwa hamwe na Elizaabeesi. Elizaabeesi akabagira ati: ‘Naija kwetwa Yohaana.’ Bakamugira bati: ‘Omuri beene wanyu tihariho n’omwe orikwetwa Yohaana. Mwete nk’erya ishe Zekaria.’ Kwonka Zekaria akahandiika ati: ‘Eiziina rye ni Yohaana.’ Omu kaanya ako, Zekaria akagaruka yaagamba! Amakuru agarikukwata aha mwana ogwo gakajanjaara omuri Buyudaaya yoona, kandi abantu bakatangaara nibagira bati: ‘Mbwenu omwana ogu aryaba ata?’

Bwanyima Zekaria akatunga omwoyo gurikwera. Kandi  yaagamba ati: ‘Yehova ahimbisibwe. Akaraganisa Abrahamu ngu naija kwohereza, Mesia, kutujuna. Yohaana aryaba nabi, kandi atebeekanise omuhanda gwa Mesia.’

Ekintu eky’omutaano kikaba ahari Mariamu omunyabuzaare wa Elizaabeesi. Ka tukireebe omu eishomo erindi.