Mɔɔ bɛyɛle Gyɛlusalɛm bane ne boɛ bɛwiele la anzi ɛvolɛ mɔɔ bo 400 la anu, ɛnee ɛsɔfo bie mɔɔ bɛfɛlɛ ye Zɛkalaya la nee ɔ ye Ɛlezabɛte de bikye suakpole ne. Bɛgyale la ɛhyɛ kpalɛ, noko ɛnee bɛtɛwole. Kenle ko bie mɔɔ ɛnee Zɛkalaya ɛlɛkpu ayilevuanlɛ wɔ ɛzonlenlɛ sua ne anu la, anwumabɔvolɛ Geebeleɛle rale ɛkɛ. Zɛkalaya ahonle dule, noko Geebeleɛle hanle kɛ: ‘Mmasulo. Meka edwɛkɛ kpalɛ mɔɔ vi Gyihova ɛkɛ la meahile wɔ. Ɛ ye Ɛlezabɛte bawo kakula nrenyia na bɛbavɛlɛ ye Dwɔn. Gyihova ɛkpa Dwɔn kɛ ɔyɛ gyima titili bie.’ Zɛkalaya bizale kɛ: ‘Kɛ ɔkɛyɛ na mealie wɔ meali ɛ? Me nee me ye, yɛyɛ mrelera.’ Geebeleɛle hanle kɛ: ‘Nyamenle a ɛzoa me kɛ menga edwɛkɛ ɛhye mengile wɔ a. Noko kɛmɔ wɔanlie me edwɛkɛ ne wɔanli la ati, ɛbayɛ mumule too bawo kakula ne.’

Zɛkalaya hyɛle kpalɛ wɔ ɛzonlenlɛ sua ne anu. Yemɔti, mekɛ mɔɔ ɔvindele la, ɛnee menli ne kulo kɛ bɛnwu mɔɔ zile la. Noko ɛnee Zɛkalaya ɛngola tendɛ. Ɛnee ɔ sa ala a ɔfa ɔyɛ sɛkɛlɛneɛ a. Akee menli ne nwunle kɛ yede edwɛkɛ bie yevi Nyamenle ɛkɛ.

Kɛ mɔɔ anwumabɔvolɛ ne hanle la, nzinlii, Ɛlezabɛte nrenzɛle na ɔwole kakula nrenyia. Ɛlezabɛte agɔnwo mɔ nee ye mbusuafoɔ rale kɛ bɛbanlea kakula ne. Bɛ nye liele kpole. Ɛlezabɛte hanle kɛ: “Bɛbavɛlɛ ye Dwɔn.” Bɛhanle kɛ: ‘Awie biala ɛnle wɔ abusua ne anu mɔɔ bɛfɛlɛ ye Dwɔn a. Fa ye to ye papa Zɛkalaya.’ Noko Zɛkalaya hɛlɛle kɛ: “Ye duma a le Dwɔn.” Ɛkɛ ne ala, Zɛkalaya holale dendɛle bieko! Bɛdele kakula ne anwo edwɛkɛ wɔ Dwudiya amuala na menli ne hanle kɛ: “Duzu a kakula ɛhye bayɛ a?”

Akee sunsum nwuanzanwuanza ne wolole Zɛkalaya. Ɔhanle ngapezo kɛ: ‘Ayɛlɛyelɛ ɛha Gyihova. Ɔbɔle Ebileham ɛwɔkɛ kɛ ɔbamaa Mɛzaya ne aralie yɛ. Dwɔn bayɛ ngapezonli na yeaziezie adenle yeamaa Mɛzaya ne.’

 Debie titili bie noko zile Ɛlezabɛte busuanli Mɛle anwo zo. Maa yɛnlea mɔɔ zile la wɔ tile bieko anu.