Jerusalén pircacunata cutin shayachishcamantaca ñami 400 yalli huatacuna pasashca carca. Jerusalén cꞌuchullapimi Zacarías shuti sacerdote paipaj huarmi Elisabethuan causarca. Achca huatacunata cazadocuna cashpapish huahuacunata mana charircacunachu. Shuj punllaca Diospaj huasipimi Diospaj ucuman yaicushpa Zacariasca inciensota rupachicurca. Chaipimi ángel Gabriel ricurirca. Pai achcata mancharijpimi angelca, ‘ama manchaichu. Alli huillaicunatami apamuni. Cambaj huarmi Elisabetca, shuj cꞌari huahuatami huachanga. Juan shutita churangui. Diosca Jesús shamunata huillachunmi paitaca agllashca’ nircami. Zacariasca, ‘ñucapish ñuca huarmipish ñamari yuyajcuna canchij. ¿Ima shinataj can huillashca pajtanataca yachashari?’ nircami. Angelca, ‘Diosmi canman cai alli huillaita huillachun cacharca. Ñuca huillashcata mana crishcamanta cunanca cambaj huahua huacharingacama upami saquiringui’ nircami.

Zacariasca Diospaj ucumanta mana utca llujshircachu. Pai llujshijpica canllapi shuyacujcunaca ima tucushcatami yachasha nircacuna. Pero Zacariasca mana parlai tucushpami maquillahuan señasta rurarca. Chaimi gentecunaca Dios paiman imata huillashcata cuentata curcacuna.

Asha tiempo qꞌuipaca ángel nishca shinami Elisabetca shuj cꞌari huahuata charirca. Paipaj familiacuna, amigocuna, huahuata rijsinaman shamujpica Elisabetca, ‘Juan shutimi canga’ nircami. Chaimi paicunaca, ‘cambaj familiapica chai shutica mana tiyanchu. Paipaj yaya shina Zacariasta shutichichij’ nircacunami. Pero Zacariasca, ‘paipaj shutica Juanmi’ nishpami quillcarca. Chai ratomi Zacariasca parlai callarirca. Chai huahuamantaca tucui Judeapimi yachaj chayarcacuna. Gentecunaca, ‘chai huahua jatunyashpaca ¿ima shinashi canga?’ nishpami tapurircacuna.

Dios paipaj espíritu santota cujpimi Zacariasca, ‘Jehová Diosta alabashunchij. Paica Abrahammanca ñucanchijta quishpichichun Mesiasta cachanatami huillarca.  Chaipajca Juanmi profeta canga. Paimi Mesías purina ñanta allichishpa ñaupashpa ringa’ nircami.

Shinallataj Elisabetpaj familia Mariahuan ima tucushcatami shamuj capitulopica yachashun.