Jerusalenpa pirqanta tukurusqankumantam 400 wataña pasarurqa, chay llaqtapa hichpanpim sacerdote Zacariaswan warmin Elisabet yacharqaku. Paykunaqa unay wataña casarasqa kaspankupas mana churi-wawayuqmi karqaku. Huk kutipim Diospa wasinpi miski asnaq inciensota Zacariasqa Diospaq kañapuchkaptin Gabriel sutiyuq angel rikuriykuspan nirqa: “Ama manchakuychu. Jehova Diosmantam allin willakuyta apamuchkayki. Warmiki Elisabetmi qari wawata wachakunqa, sutinmi kanqa Juan. Payqa Jehova Diospaq sapaqchasqam kanqa”, nispa. Chaynata niptinmi Zacarias nirqa: “Ñuqaykuqa yuyaqñam kaniku, manañam churi-wawayuqqa kaymankuchu”, nispa. Angelñataqmi nirqa: “Qamqa iskayrayasqaykiraykum churiki nacenankama rimayta mana atinkichu”, nispa.

Zacariasqa Diospa wasinmanta lluqsiramuptinmi runakuna tapurqaku imanasqa unamusqanmanta. Zacariasmi ichaqa mana ima niytapas atirqachu. Chaynapim runakunaqa musyarurqaku ukupi imatapas rikuramusqanmanta.

Chaymi angelpa nisqanman hina Elisabetqa qari wawata wachakururqa. Hinaptinmi Elisabetqa riqsinakusqankunawan ayllunkuna watukuptin willarqa wawanpa sutin Juan kananmanta. Paykunañataqmi nirqaku taytanpa sutillanta apananpaq. Zacariasmi ichaqa qillqarqa: “Sutinqa Juanmi”, nispa. Chaynata qillqachkaptinmi chayraq rimayta atirurqa. Hinaptinmi lliw runakunapas yacharuspanku nirqaku: “¿Imaraq kay wawaqa kanqa?”, nispa.

Chaymi Zacariasqa Dios yanapaykuptin nirqa: “¡Jehova Diosyá hatunchasqa kachun! Churiy Juanqa Diospa akllasqan runamanta willakuqmi kanqa, chay akllasqa runamantam Diosqa Abrahanman willarqaña”, nispa.

 Qatiqninpim yachasun Maria sutiyuq sipasmanpas Jehova Diospa angelnin rikuriykusqanmanta, Mariaqa Elisabetpa ayllunmi karqa.