Jerusalén llaqtaq perqankuna sayarichisqa kasqanmantaqa 400 watakunañan pasaran. Juj sacerdoteq sutinmi karan Zacarías, payqa esposayoqmi karan, Jerusalén llaqtaq qayllanpitaq tiyaranku. Unayñan kuska tiyaranku ichaqa manan wawanku karanchu. Juj p’unchaymi Zacariasqa templopi kaq ch’uya cuartopi inciensota q’apachisharan, jinan ángel Gabriel payman rijuriran. Zacariasqa sinchitan mancharikuran, angelmi ichaqa niran: “Ama manchakuychu, juj sumaq noticiatan willasayki, esposaykin juj qhari wawata onqokunqa, sutintaq kanqa Juan. Diosmi payta ajllan juj sumaq llank’aypaq”, nispa. Zacariastaq niran: “¿Imaynapin chay pasanman? Noqaykuqa kuraqñan kayku wawayoq kanaykupaq”, nispa. Gabrieltaq niran: “Noqataqa Diosmi kachamuwaran kayta willanaypaq. Mana creewasqaykiraykun mana rimayta atinkichu wawayki nacenankama”, nispa.

Zacariasqa unaymi ch’uya cuartopi kamuran. Lloqsimuqtintaq runakunaqa yachayta munaranku paywan imachus pasasqanta. Zacariasqa manan rimayta atiranchu. Makinkunallawanmi señakunata ruwaran. Chaypin runakunaqa yacharanku Zacariasqa Diosmanta juj mensajeta uyarisqanta.

Tiempowanmi Elisabetqa juj qhari wawata onqokuran, angelpa willasqanman jina. Chaymi amigonkunapas parientenkunapas anchata kusikuranku. Elisabetmi niran: “Juanmi sutin kanqa”, nispa. Paykunataq niranku: “Familiaykipiqa manan pipas chay sutiyoqqa kanchu, papan jina ‘Zacarías’ sutiyoq kachun”, nispa. Zacariasta tapuqtinkutaq payqa qelqaran “Juanmi sutinqa” nispa. Chay ratopin Zacariasqa wajmanta rimaripuran. Chay wawamanta noticiataqa llaqtantinpi runakunan uyariranku, jinan niranku: “¿Imachá kay wawaqa kanqa?”, nispa.

Jinan Zacariasqa santo espirituq junt’aykusqan niran: “Jehová Diosta jatunchasun. Paymi Abrahanman  prometeran salvawananchispaq Mesiasta kachamunanpaq. Juantaq profeta kaspa Mesiaspaq ñanta preparanqa”, nispa.

Jinaspapas Elisabetpa parienten Mariapaqmi sumaq noticia kallarantaq. Chaytan qatimuq willakuypi yachasun.