Zacarías shuti sacerdotepa huarmica Elisabet shutimi carca. Paicunaca Jerusalén llacta ladopimi causarca. Jerusalén llactapa jatun pircacunata cutin shayachishcamandaca ñami 400 huatacuna yalishca carca. Zacarías Elisabet huarmiguhuan ashtaca huatacunata cazarashca cashpapash huahuacunataca na charircachu. Shuj punllaca Zacarías Diospa huasiman yaicushpa altarpi inciensota cushnichijujpimi ángel Gabriel ñapash ricurirca. Zacarías paita ricushpa ninanda manllarijpimi ángel Gabrielca nirca: ‘Zacarías ama manllarichu’. Jehovami cai ali villaita villachun cachamuhuarca. ‘Canba huarmi Elisabetca shuj jari huahuagutami ungunga. Chai huahuagutaca, Juan shutita’ churangui. Paitami Jehová Diosca paipa munaita pactachichun agllashca nishpa. Shina nijpimi Zacariasca tapurca: “Can villajushca pactanataca, ¿imata ricushpata yachapasha? Ñucapash rucumari cani, ñuca huarmigupash ña payagumari” capan nishpa. Chaimi ángel Gabrielca nirca: ‘Taita Diosmi, canman cai ali villaita villachun cachamuhuarca. Ñuca villajpi can na crishcamandami, huahua naciringacaman, na rimai ushashpa upa tucugringui’ nishpa.

Zacariasca Diospa huasimanda na ucha llujshimurcachu. Unaita parashpa llujshijpimi canllapi gentecunaca ima pasashcata yachangapaj munanajurca. Shinapash Zacariasca ‘na rimai ushashpami maquihuan ricuchishpalla villajurca’. Chaimi gentecunaca ninajurca Taita Diosmi muscuipishna imapash villaita villashcanga nishpa.

Jipamanga chai ángel villashcashnami Elisabetca vijsayu quedashpa shuj jari huahuaguta ungurca. Chaimi Elisabetpa familiacuna, amigocunapash ninanda cushijushpa huahuaguta ricungapaj shamunajurca. Elisabetca nircami: Juan shutitami churagrini nishpa. Shina nijpimi paicunaca cashna ninajurca: ‘Canba familia purapica, shujllapash chashna shutihuanga na tianllu’. ‘Cai huahuagutaca, paipa taitatashna Zacariasta shutichishun’ nishpa. Shinapash Zacariasca cashnami escribirca “cai huahuaguca Juan shutimi capan” nishpa. Shina escribishca jipallami Zacariasca cutin parlai usharca. Shina pasashcata Judea llactapi tucui causajcuna yachaj chayashpami cashna ninajurca: “Chai huahuagu viñashpaca, ¿imashi tucunga?” nishpa.

‘Zacariasca Diospa jucha illaj espíritu junda cashpami, Dios ima nishcata villajurca’. Jehová Diosta jatunyachishunchi. Paimi cangunata salvangapaj Mesiasta cachamusha nishpa Abrahanmanga  juramenturca. Juanga ‘Dios ima nishcata villaj cashpami, Mesiaspa ñanda alichinshna ñaupajunga’ nishpa.

Elisabetpa prima Mariapashmi shinallata shuj milagrota charishcarca. Chaitaca cati capitulopimi yachajushun.