Кодэла времятар, кала вазглэ и стины андо Иерусалимо, прожыля 400 бэрш. Найдур лэ Иерусалимостар жувэлас о Захария пэстиря хулаяса, савя ақарэнас Елизавета. О Захария сас рашай. Вонэ женати сас уже бут бэрша, но лэндэ на сас бэятцэ. Еқвар, кала о Захария ԥабарэлас о фимиамо, саво драго қандэлас, андо храмо пэ риг, пэ сави ԥэнэн свынто, каринг лэстэ авеля о анӷело о Гавриило. О Захария пэрэдарайля. Но кадэва анӷело ԥэндя: «На дар. Мэ тути андэм лэ Иеговастар лащи новость. Кай тири хулаи кай и Елизавета арақадёлапэ бэято. Ту ақарэса лэс Иоанно. О Иегова витидя лэс, кай во тэ терэл лэстири дила, сави на дя аврэнди». О Захария пушля: «Хэба кацаво может тэ авэл? Амэ уже фартэ ԥурэ ла хулаяса, кай амэндэ тэ авэл бэято». О Гавриило ԥэндя: «О Дэл ман бишалдя, кай тэ ԥэнав тути кадэла алава. Но кадя, сар ту манди на патяян, ту на дэса дума, пока на арақадёлапэ о бэято».

О Захария сас андо храмо пэ кодэя риг, пэ сави ԥэнэн свынто. Во котэ сас май бут время, чем сар кажно разо. Важ када, кала во вижыля, и мануша, савэ лэс аштярэнас аврял, линэ тэ пушэн лэстар, со стердяпэ. О Захария нащи дэлас дума, ай кати лэ вастэнца варисо сыкавэлас. Тоди и мануша полинэ, кай во ашундя алава лэ Дэвлэстар.

Сар и ԥэндя о анӷело, и Елизавета заԥирдя и латэ авеля бэято. Латирэ друӷоря и о родо авелэ тэ диқэн лэ бэятос. Вонэ фартэ сас ради важ латэ. И Елизавета ԥэндя: «Лэс ақарэна Иоанно». Но и мануша динэ наздив: «Тумэн андо ери никас кадя на ақарэн. Приԥэнэн лэсти Захария, сар ақарэн лэстирэ дадэс». Но о Захария пистросардя: «Лэс ақарэна Иоанно». И андэ кадэя время о Захария упалэ задя дума! Пала кода, кай арақаделяпэ о бэято, уӷанглэ па вся Иудея. Тоди и мануша линэ тэ пушэн: «Ко авэла кадэва бэято?»

Тоди по Захария сжыля свынто духо, и во ԥэндя кацавэ алава, савэ англэ инке трэбуй тэ авэн: «Хвалисарас  лэ Иеговас! О Иегова дя лэ Авраамости алав, кай бишалэла лэ спасителёс, лэ Христос, кай тэ спасый амэн. О Иоанно авэла кодэва, ко лэла тэ пэрэдэл лэ Дэвлэстирэ алава и тэ ԥэнэн лэ народости, кай авэла о Христос».

И Елизавета сас родо ла Марияти. Ла Марияса стердяпэ кацаво же, со сас ла Елизаветаса. Пала када амэ уӷанаса май дур.