NSOLO 68
Elizabheti Akhala na Mwana
Pakupita pyaka 400 Yerusalemu mbadamala kumangwa papswa, nyantsembe akhacemerwa Zakariya na nkazace, Elizabheti, akhakhala cifupi na nzinda unoyu. Papita pyaka pizinji mbadamala kale kumanga banja, mbwenye iwo nee akhali na mwana. Ntsiku inango, mukhapereka Zakariya ntsembe zakununkhira mu mbuto yakucena ya mu templo, iye aona anju Gabhriyeli. Zakariya akhagopa, mbwenye Gabhriyeli alonga: ‘Leka gopa. Ndabwera na mphangwa zadidi za Yahova. Nkazako Elizabheti anadzakhala na mwana, pontho dzina yace inadzakhala Juwau. Yahova asankhula Juwau toera kuphata basa yakupambulika.’ Zakariya abvundza: ‘Ndinakhulupira tani pyenepi? Ine na nkazanga takalamba kakamwe toera kukhala na mwana.’ Gabhriyeli alonga: ‘Ndi Mulungu adandituma toera kukudziwisa mphangwa izi. Mbwenye nakuti nee wakhulupira pidalonga ine, unadzakhala bewewe mpaka kubalwa kwa mwana.’
Zakariya akhala mu templo ndzidzi uzinji kupiringana ntsiku zonsene. Pidabuluka iye, anthu akhadikhira kunja akhafuna kudziwa ninji pidancitikira. Zakariya nee akhakwanisa kulonga. Basi ene mbadaphatisira manjace toera kulonga. Natenepa, anthu adzindikira kuti Zakariya atambira mphangwa za Mulungu.
Mukupita kwa ndzidzi, Elizabheti adzakhala na pathupi mbabala mwana wamamuna, ninga mukhadalongera anju. Axamwali ace na acibale ace abwera toera kuona mwana. Iwo atsandzaya kakamwe. Elizabheti alonga: ‘Dzina yace ndi Juwau.’ Iwo alonga: ‘Nee m’bodzi wa acibale anu anacemerwa Juwau. Ncemereni na dzina ya babace, Zakariya.’ Mbwenye Zakariya alemba pa citabwa: ‘Dzina yace ndi Juwau.’ Mu ndzidzi ubodzi ene, Zakariya atoma pontho kulonga! Anthu a mu Yudeya adzumatirwa na pidabva iwo thangwi ya mwana unoyu, mbabvundzika: ‘Kodi mwana unoyu anadzakhala tani?’
Na ciphedzo ca nzimu wakucena, Zakariya alonga profesiya iyi: ‘Mbasimbwe Yahova. Iye apikira kuna Abhrahamu kuti mbadatuma Mpulumusi, Mesiya, toera kutipulumusa. Juwau anadzakhala mprofeta, pontho anadzasasanyira njira Mesiya.’
Cinthu cakudzumatirisa cacitikambo kuna wacibale wa Elizabheti akhacemerwa Mariya. Tinadzapfundza pyenepi mu nsolo unatowera.
‘Kuna anthu nkhabe kwanisika mbwenye kuna Mulungu pyonsene mphyakukwanisika.’—Mateo 19:26
Panango Munakomerwa Kudziwa Ipi
PFUNDZANI MBIRI ZA M’BHIBHLYA
Juwau Akhunganya Njira
Juwau akula mbakhala mprofeta. Iye akhapfundzisa kuti Mesiya akubwera. Kodi anthu akhuyiwa tani na mphangwa zenezi?
YEZU—NDI NJIRA, UNDIMOMWENE NA UMASO
Mphangwa Ziwiri Zakubuluka Kwa Mulungu
Anju Gabhriyeli alonga mphangwa zakuti zikhali zakunentsa toera kukhulupira.
YEZU—NDI NJIRA, UNDIMOMWENE NA UMASO
Kubalwa Kwa Ule Akhafuna Kukhunganya Njira
Pidatoma iye kwene kulonga mwacirengo, Zakariya alonga profesiya yakufunika kakamwe.
