A hon ngu 400 awe na peko ti so a kiri a leke agbagba ti Jérusalem, mbeni prêtre ayeke dä so iri ti lo ayeke Zacharie, na iri ti wali ti lo ayeke Élisabeth, ala yeke lango nduru na gbata ti Jérusalem. Ala sara mariage a sara angu mingi awe me ala dü molenge ape. Mbeni lâ, na ngoi so Zacharie angbâ ti zö dukane na yâ ti kubu ti temple, ange Gabriel asi. Mbeto asara Zacharie, me ange ni atene: ‘Sara mbeto ape. Mbi ga na mo mbeni nzoni sango so alondo na Jéhovah. Wali ti mo Élisabeth ayeke dü ande na mo mbeni molenge-koli na a lingbi a zia iri ti lo Jean. Jéhovah asoro Jean ti sara mbeni kua so ayeke nde.’ Zacharie angbâ ahunda ndo, atene: ‘Mbi yeke mä na bê na tënë ti mo ni tongana nyen? so na mara ngu ti e so e lingbi ti dü molenge ape so.’ Gabriel atene na lo: ‘Nzapa la atokua mbi ti tene na mo sango ni so. Me teti so mo mä na bê na mbi ape, mo yeke sara tënë ape juska a dü molenge ni si.’

Zacharie ayeke na yâ ti kubu ti temple ni, ti so ni so lo ninga kâ. Na ngoi so lo sigi, azo so ayeke ku lo na gigi aye ti hinga ye so apassé. Zacharie apeut ti sara tënë ape. Lo yeke sara gï geste na maboko ti lo awe. Azo ni aga fadeso ti hinga so Zacharie alondo ti wara mbeni sango so alondo na Nzapa.

Tongana ngoi ayeke hon, Élisabeth amû ngö na lo dü mbeni molenge-koli, gï tongana ti so ange ni atene lani. Akamarade ti lo nga na afami ti lo aga ti bâ bébé ni. Terê ti ala anzere mingi. Élisabeth atene: ‘E yeke zia iri ti lo Jean.’ Azo ni atene: ‘Iri ti zo oko na yâ ti fami ti mo ayeke Jean ape. Zia iri ti lo Zacharie, tongana ti babâ ti lo.’ Me Zacharie asara na mbeti atene: ‘Iri ti lo ayeke Jean.’ Mo ye ti bâ, Zacharie akomanse ti sara tënë! Tënë ti bébé ni so amû yâ ti Judée kue, na azo ayeke hunda terê ti ala: ‘Molenge so ayeke duti ande tongana nyen?’

Na pekoni, Zacharie asi na yingo vulu. Lo tene prophétie so: ‘Zia a sepela Jéhovah. Lo mû zendo na Abraham so Lo yeke tokua mbeni sauveur, wala Messie,  ti sö e. Jean ayeke ga ande prophète, na lo yeke leke lege na Messie.’

Mbeni ye so ayeke nde mingi asi nga na Marie so ayeke mbeni fami ti Élisabeth. E yeke sara tënë na ndö ni na yâ ti chapitre ti peko.