Yerusaalamete huxxa galagalle huxxininku 400 diro saino. Yerusaalamete katamira Zakkaariyaasi yinanni kakkalaanchi no; isira Elsaabeexi yinanni galte noosi. Lamunku adhaminku lowo diro ikkirono ooso diˈˈilino. Mitto barra Zakkaariyaasi qullaawu mini giddo hixaana giiranni heeˈreenna, Gebirieeli yinanni sokkaasinchi isiwa dayi. Zakkaariyaasi lowo geeshsha waajji; sokkaasinchu kayinni togo yiisi: ‘Waajjitooti. Yihowawiinni dancha duduwo haaˈre dayoommohe. Galtekki Elsaabeexi labbaa qaaqqo iltanno; suˈmasino Yohaannisi yine fushshinanni. Yihowa Yohaannisi baxxino looso loosanno gede doorino.’ Zakkaariyaasi togo yee xaˈmi: ‘Konne coye hiitto ikke ammaneemmo? Aninna galteˈya geedhinoommo daafira ooso ila didandiineemmo.’ Gebirieeli togo yiisi: ‘Konne duduwo kuleemmohe gede soyinoehu Maganoho. Ati kayinni kuloommohere ammana giwootto daafira, qaaqqu ilama geeshsha danqicha ikkatto.’

Zakkaariyaasi hakko barra qullaawu mini giddo albinni roore keeshshino. Gedensaanni Zakkaariyaasi qullaawu mininni fulanno woyite, mannu ikkinore xaˈmasira gobbaanni agare no. Zakkaariyaasi kayinni coyiˈra didandiino. Isi angatenni calla malaatisi. Hakkiinni mannu iso Maganu hasaawisinosita wodanchino.

Yannate gedensaanni sokkaasinchu yiinonte gede, Elsaabeexi godobbe labbaa qaaqqo iltu; jaallasenna fiixise ise hobbaate haaˈrara dayi. Insa Elsaabeexi qaaqqo iltino daafira lowo geeshsha hagiidhino. Elsaabeexi, ‘Suˈmisi Yohaannisiiti’ yitu. Insa kayinni togo yiise: ‘Fiixikki giddo Yohaannisi yinannihu dino. Konni daafira qaaqqoho annu suˈminni Zakkaariyaasi yite fushshi.’ Zakkaariyaasi kayinni, “Suˈmisi Yohaannisiiti” yee borreessi. Hatte yannara, Zakkaariyaasi galagale coyiˈra hanafi! Yihudaho heeˈranno manni baalu hakko qaaqqi duduwo macciishshi; qoleno ‘Kuni qaaqqi lophiro hiittooha ikkanno ikka?’ yee hedino.

 Hakkiinni Zakkaariyaasira qullaawu ayyaani dirrisi. Isi togo yee masaalo coyiˈri: ‘Yihowa maassamo! Isi Abirihaamira “Gatisaanchonna Mesihicha soyeemmo” yee qaale eino. Yohaannisi masaalaancho ikkanno; hattono isi Mesihichaho doogo qixxeessanno.’

Elsaabeexi fiixa ikkitinote Maariyaamirano dhagge ikkannori iillinose. Aante noo xaggera tenne daafira ronseemmo.