Na iai se ositaulaga e igoa iā Sakaria ma lana avā o Elisapeta, na nonofo latalata ane i le aai o Ierusalema. O le taimi lea ua silia i le 400 tausaga talu ona māeʻa le toe fausiaina o pā o Ierusalema. Ua tele tausaga talu ona la faaipoipo ae e leʻi iai lava se la fanau. I se tasi aso a o faamū e Sakaria mea manogi i totonu o le Mea Paia o le malumalu, na faaali mai ai iā te ia le agelu o Kaperielu. Na fefe Sakaria ae na faapea mai Kaperielu: ʻAua e te fefe. Ua ou aumaia se tala lelei mo oe mai iā Ieova. O le a fanauina e lau avā o Elisapeta se tama tama, ma o le a faaigoa o ia iā Ioane. Ua tofia e Ieova Ioane e faia se galuega faapitoa.’ Na fesili atu Sakaria: ʻE faapefea ona ou iloa e moni lenei mea? Auā ua ou toeaina ma ua loomatua foʻi laʻu avā.’ Na tali mai Kaperielu: ʻUa auina mai aʻu e le Atua e faailoa atu lenei tala. Ae talu ai e te lē talitonu iā te aʻu, o le a lē mafai ona e tautala seʻia oo i le taimi e fanau mai ai le pepe.’

Sa iai Sakaria i totonu o le malumalu mo se taimi umi nai lo o le umi e masani ai. O lea ina ua sau o ia i fafo mai i le malumalu, na fia iloa e tagata sa faatali atu i fafo le mea na tupu. Peitaʻi, e na o taga sa mafai ona ia faia. O i inā na iloa ai e tagata na maua e Sakaria se feʻau mai i le Atua.

Mulimuli ane, ona tō lea o Elisapeta ma fanauina ai se tama tama e pei lava ona taʻua e le agelu. Na asiasi atu ana uō ma ona tauaiga e vāai i le pepe, ma na matuā fiafia i latou. Na faapea atu Elisapeta iā i latou: ʻO le a faaigoa o ia iā Ioane.’ Ae na latou tali mai: ʻE leai se tagata o lou aiga e igoa iā Ioane. Faaigoa o ia iā Sakaria lona tamā.’ Peitaʻi na tusi i lalo e Sakaria upu nei: ʻO Ioane lona igoa.’ O le taimi lava lenā na mafai ai ona toe tautala Sakaria. Ua salalau atu tala e faatatau i le pepe i vaipanoa uma o Iutaia, ma ua faapea ane tagata: ʻO le ā le ituaiga o tagata o le a iai lenei tamaitiiti?’

Ona faatumulia lea o Sakaria i le agaga paia, ma na ia  valoia: ʻIa viia Ieova. Na ia folafola mai iā Aperaamo o le a ia auina mai se faaola, le Mesia e laveaʻiina i tatou. O le a avea Ioane ma perofeta, ma o le a ia saunia le ala mo le Mesia.’

Na iai foʻi se mea mataʻina na tupu iā Maria le tauaiga o Elisapeta. Seʻi o tatou talanoaina lenā mea i le lesona o loo sosoo mai.