Ěpạ u hasụ su taunge seng nal᷊iu dongkeng těndạ u Yerusalem saụ nikoạ. Sěngkatau imang arenge i Zakharia dingangu kawinge, i Elisabet, mětẹ̌tanạ maraning soa ene. Seng marěngụ i sire nẹ̌kawing katewe bědang tawe nakaěbạ anạ. Piạ su sahěllo, i Zakharia něgělị sasěmbah dupa su Ruang Masusi su bait. Sěngkělěndịu, malaekatẹ̌ Gabriel siměpụ. Zakharia sěbạe natakụ, katewe malaekatẹ̌ ene nẹ̌bera, ’Abe katakụ. Piạ habarẹ̌ mapia bọu i Yehuwa. Kawingu, i Elisabet, sarung makaěbạ anạ esẹ, kụ arengko anạ ene, Yohanes. Yehuwa němile si Yohanes gunang měkoạ tugasẹ̌ khusus.’ Zakharia nẹ̌bera, ’Kahěngang bue? I kami seng maghurang. Seng tawe makaěbạ ana.’ Gabriel naul᷊ị, ’Mawu něngoro si siạ pěhabarẹ̌ hal᷊ẹ̌ ini. Katewe ual᷊ingu i kau tawe mangimang, i kau tawe makapẹ̌bisara sarang anạ ene malahirẹ̌.’

Zakharia sěbạe marěngụ su ral᷊ungu Ruang Masusi. Hakị u ene su tempong i sie siměbang, taumata apang něngampal᷊ẹ̌ su likude mapulu makasingkạ apa nariadi. Katewe, i Zakharia tawe nakapẹ̌bisara. I sie kětạeng botonge měkoạ isyarat. I sire apidu nasadarẹ̌ i Zakharia kai nakaěbạ tatanata bọu Mawu.

Samurine, i Elisabet natiang kụ nělahirkan anạ esẹ, mẹ̌sul᷊ung kere seng niul᷊ị u malaekatẹ̌. Manga hapị dingangu anạu sěngkataune diměnta gunang měmanda anạe. I sire sěbạe mal᷊uasẹ̌. Elisabet nẹ̌bera, ’Arenge Yohanes.’ I sire nẹ̌bera, ’Su kěluarganu tawẹ apa areng Yohanes. Gělịe areng Zakharia, kere i papạe.’ Katewe i Zakharia němohẹ, ’Arenge Yohanes.’ Su tempo ene lai, Zakharia saụ nakapẹ̌bisara! Taumata su Yudea měbẹ̌bawěke soal u anạ ene, kụ i sire mětẹ̌tiněna, ’Su tempo mahi anạ ene sarung makoạ apa ang?’

Bọu ene i Zakharia nakaěbạ rohkẹ̌ masusi kụ i sie nẹ̌bera, ’Karaloko i Yehuwa. I Sie nẹ̌diandi si Abraham sarung měndingọ sěngkatau měnanal᷊amatẹ̌, ene kai  i Mesias, gunang měnal᷊amatẹ̌ si kitẹ. Yohanes sarung makoạ nabi, kụ i sie sarung měnadia ral᷊eng gunang Mesias.’

I Maria, anạu tahatuaring i Elisabet lai nakahombang hal᷊ẹ̌ sěbạe makạlaherang. Bọete i kitẹ mẹ̌basa běke tuhụe.