Nipetrake narine i Jerosalema niharo amy i Elizabeta vali’e ty Zakaria mpisorogne, 400 taogne tafara ty namboaragne i manda i Jerosalemay. Fa ela ty nifanambalia iareo faie tsy nanagn’anake iareo. Nanao fagnatetse raha magnitse tamy i tempolỳ ao ty Zakaria tie indraike, le niseho tama’e ty anjely atao tihoe Gabriela. Natahotse ty Zakaria, faie hoe ty Gabriela: ‘Ko matahotse rehe fa nirahe i Jehovah hitalily raha soa ho azo raho. Hiterake ana-dahy ty Elizabeta vali’o, le i Jaona ty ho agnara’e. Tinendre i Jehovah hanao asa manokagne reke.’ Hoe ty Zakaria: ‘Akore ty hiteraha’ay? Izahay mirovaly fa sambe antetse!’ Hoe ty Gabriela: ‘Nirahen’Andrianagnahare hirehake izay ama’o raho. Satria tsy inoa’o zay, le ho moagne rehe amparake ty hiterahagne ze ajaja zay.’

Niela tamy i tempolỳ tao tsy nanahake ty fatao’e ty Zakaria. Fa nandigne aze tan-tane ao avao i vahoakey, fa te hahafantatse ty raha niseho. Nanjare moagne reke naho fa niakatse boake ao, le i tagna’ey avao ro nanoa’e fihetseke. Le avy le nifanta i vahoakey tie nahazo hafatse boake amy i Jehovah reke.

Naho fa nandeha ty fotoagne, le nivesatse vata’e ty Elizabeta sady niterake ana-dahy. Toe izay ka ty nirehafe i anjelỳ. Nagnente ty ana i Elizabeta iaby ty longo’e sady nifale. Le hoe ty Elizabeta: ‘I Jaona ty hatao agnara’e.’ Le hoe iareo: ‘Tsisy managne agnaragne hoe zay ty longo’o. Ndraleo atao Zakaria mitovy amy ty agnaran-drae’e.’ Faie nanoratse ty Zakaria tie: ‘I Jaona ty agnara’e.’ Nanomboke tamy izay, le afake nirehake indraike ty Zakaria. Gaga iaby i ndaty rey naho fa naharey ty laza i ajajay, sady hoe iareo: ‘Ajaja hanao akore koahe itoio naho fa bey?’

Nanjare feno fagnahy masigne ty Zakaria, le naminany tie: ‘Hisaoragne abey ty Jehovah. Nampitamà i Abrahama  reke tie handefa mpagnavotse, le i Mesia, ie ty hagnavotse antika. Ho mpaminany ty Jaona sady hagnomagne ty lala i Mesia.’

Nisy raha niambake ka niseho tamy i Maria, longo i Elizabeta. Andao ho henteantikagne zay.