Yange i hide i maa ukpekpe mba gilgar u Yerusalem la anyom kar je hemba 400. Tsô pristi ugen, iti na ér Sekaria, vea kwase na Elisabetu, ve va lu hen ijiir igen ikyua a geri u Yerusalem la. Yange ve er ivese anyom kar kpishi, kpa ve lu a wan ga. Tsô iyange igen Sekaria nyôr ken tempel sha u za nanden naagh ku human doon. Maa ortyom Gaberiel va ande hen a na. Cier Sekaria iyol kpishi, kpa Gaberiel kaa a na ér: ‘I de cier we iyol ga. Yehova tindim ér m va ôr u loho u dedoo. Kwase wou Elisabetu una va mar wan u nomso, nahan u ii un iti wer Yohane. Yehova yange tsua Yohane ér a va er tom u vesen.’ Sekaria pine ér: ‘A er nan man me fa mer kwagh u u ôr ne ka mimi? Sha ci u mo man kwase wam cii se bee iyol kar u maren wan.’ Gaberiel kaa a na ér: ‘Ka Aôndo a tindim ér m va ôr u loho ne ye. Kpa er u nem jighjigh ga yô, u kera lam ga zan zan a kar maren wan la.’

Sekaria yange shi ken tempel sha iyange ne hemba er vanden shin ker la. Nahan va duen ken won yô, mba ve lu keghen un la soo u fan kwagh u a er un yô. Kpa Sekaria fatyô u lamen ga. Lu masen ôron kwagh a ve sha ave. Ior mbara maa fa je ér Aôndo tindi ortyom va ôr Sekaria loho.

Shighe karen yô, Elisabetu wa iyav. Tsô a mar wan u nomso, vough er ortyom la yange kaa nahan. Azende a Elisabetu kua anmgbianev nav va u va nengen wan shon. Yange saan ve iyol kpishi er a mar wan yô. Elisabetu kaa ér: ‘A yilan iti na ér, Yohane.’ Taver ve, ve kaa ér: ‘Or môm ken tsombor wou kpa nan ya iti ér Yohane ga. Nahan ii un iti wer, Sekaria; i yilan un sha iti i ter na.’ Kpa Sekaria gema nger kwagh ér: “Iti na ér, Yohane.” Hen shighe la je maa Sekaria hide hii u lamen! Yange ior ungwa kwagh u wan la ken tar u Yuda cii, shi ve lu pinen ér: ‘Man wan shon yô, una va lu nyi or jimi?’

Sekaria yange iv a icighan jijingi hen shighe la. Nahan a ôr kwaghôron u profeti, a kaa ér: ‘I wuese Yehova. Yange tôndo  zwa a Aberaham ér una tindi oryiman, Mesiya, a va yima se. Yohane una lu profeti, shi una sôr gbenda sha ci u Mesiya.’

Maria, anmgbian u Elisabetu kpa yange kwagh u kpilighyol va er un. De se fa kwagh shon ken ityough ki ki dondo sha kin la.