ʻI he taʻu ʻe 400 tupu hili hono toe langa ʻa e ʻā ʻo Selusalemá, naʻe nofo ʻo ofi ki he koló ha taulaʻeiki ko Sākalaia mo hono uaifí ko ʻIlisapesi. Naʻá na mali ʻi ha ngaahi taʻu lahi ka naʻe ʻikai ke ʻi ai haʻana fānau. ʻI he ʻaho ʻe taha naʻe hā ai ʻa e ʻāngelo ko Kepalelí kia Sākalaia lolotonga ʻene tutu ʻinisēnisi ʻi he lotoʻā ʻo e temipalé. Naʻe ilifia ʻa Sākalaia, ka naʻe tala ange ʻe Kepaleli: ‘ʻOua ʻe ilifia. ʻOku ou haʻu mo ha ongoongo lelei kiate koe meia Sihova. Ko ho uaifí, ʻa ʻIlisapesi, te ne fanauʻi ha tama pea ʻe ui ia ko Sione. Kuo fili ʻe Sihova ʻa Sione ki ha ngāue makehe.’ Naʻe ʻeke ange ʻe Sākalaia: ‘ʻE lava fēfē ke u tui atu kiate koe? Ko au mo hoku uaifí ʻokú ma fuʻu motuʻa ke toe maʻu ha fānau.’ Naʻe pehē ʻe Kepaleli: ‘Kuo fekauʻi mai au ʻe he ʻOtuá ke tala atu kiate koe ʻa e ongoongo ko ení. Ka koeʻuhi ko e ʻikai te ke tui mai kiate aú, heʻikai te ke lava ʻo lea kae ʻoua kuo fāʻeleʻi ʻa e pēpeé.’

Naʻe nofo ʻa Sākalaia ʻi he lotoʻaá ʻo fuoloa ange ʻi he tuʻunga anga-mahení. Ko ia ʻi he faifai peá ne hū ki tuʻá, naʻe fiemaʻu ʻe he kakai naʻa nau tatali ʻi tuʻá ke ʻiloʻi pe ko e hā naʻe hokó. Naʻe ʻikai ke lava ʻa Sākalaia ʻo lea. Naʻá ne fai pē ha fakaʻilonga ʻaki hono nimá. Naʻe ʻiloʻi leva ai ʻe he kakaí naʻe maʻu ʻe Sākalaia ha fekau mei he ʻOtuá.

ʻI he faai atu ʻa e taimí, naʻe feitama ʻa ʻIlisapesi peá ne fāʻeleʻi ha pēpē tangata, ʻo hangē pē ko ia naʻe tala ange ʻe he ʻāngeló. Naʻe omi ʻa hono ngaahi kaumeʻá mo e kāingá ke feʻiloaki mo e pēpeé. Naʻa nau fiefia ʻaupito ʻi he meʻa naʻe hoko kia ʻIlisapesí. Naʻá ne pehē: ‘ʻE ui ia ko Sione.’ Naʻa nau pehē ange: ‘ʻOku ʻikai ha taha ko Sione ʻi ho fāmilí. Ui ʻaki ia ʻa e hingoa ʻo ʻene tamaí, ʻa Sākalaia.’ Ka naʻe tohiʻi ʻe Sākalaia: ‘Ko Sione ʻa hono hingoá.’ ʻI he taimi pē ko iá, naʻe toe lava ke lea ʻa Sākalaia! Naʻe mafola ʻa e ongoongo fekauʻaki mo e pēpeé ki Siutea kotoa, pea naʻe fifili ʻa e kakaí: ‘Ko e hā ʻe hoko ki he kiʻi tama ko ení ʻi heʻene fuʻu lahí?’

Pea naʻe fonu ʻi he laumālie māʻoniʻoní ʻa Sākalaia. Naʻá ne kikite: ‘Tuku ke fakahīkihikiʻi ʻa Sihova. Naʻá ne palōmesi kia  ʻĒpalahame te Ne fekau mai ha fakamoʻui, ko e Mīsaiá, ke ne fakahaofi kitautolu. ʻE hoko ʻa Sione ko ha palōfita, pea te ne teuteu ʻa e hala ki he Mīsaiá.’

Naʻe toe hoko ha meʻa makehe ki ha kāinga ʻo ʻIlisapesi ko Mele. Tau sio angé ki he meʻá ni ʻi he vahe hono hokó.