Kakwiindide minyaka iili 400 miduli yaJerusalemu niyakayakululwa, mupayizi Zakkariya amukayintu wakwe Elizabbeti, bakali kukkala afwiifwi amuunzi ooyu. Bakakwetene kwaminyaka miingi, pesi teebakalikwe mwana pe. Limwi zuba Zakkariya naakali kuumpa tununkilizyo mutempele, wakabona mungelo Gabriyeli. Zakkariya wakayoowa pesi Gabriyeli wakati: ‘Utayoowi. Ndakweetela makani mabotu azwa kuli Jehova. Mukayintu wako Elizabbeti uzookuzyalila mwana mulombe alimwi zina lyakwe uzootegwa nguJohane. Jehova wasala Johane kuti azoochite mulimu uyandikana.’ Zakkariya wakati: ‘Ndilakusyoma biyeni? Nkaambo ime amukayintu wangu twachembaala kuti tube amwana.’ Gabriyeli wakati: ‘Ndatumwa aLeza kuti ndizookubuzye makani aaya. Pesi teewaasyoma majwi angu nkinkaako uyooba chimuumu kusikila mwana akazyalwe.’

Zakkariya wakakkala kwachiindi chilamfu mutempele. Naakazwa anze bantu bakali mulindide kabayanda kuziba zyakachitikide. Zakkariya taakachili kwaambuula. Wakali kutondeeka amaboko luzutu. Bantu bakaziba kuti Zakkariya watambula mulumbe uzwa kuli Leza.

Mukuya kwachiindi, Elizabbeti wakaminta akuzyala mwana mulombe, mbuli mbakaambide mungelo. Beenzinyina anzubo zyabo bakaza kuzoobona mwana. Bakabotelwa loko. Elizabbeti wakati: ‘Zina lyakwe nguJohane.’ Bakati: ‘Taakwe bbululu wako utegwa Johane. Muuzike lyawisi, lyakuti Zakkariya.’ Pesi Zakkariya wakalemba kuti: ‘Zina lyakwe nguJohane.’ Mpawo Zakkariya wakasaanguna kwaambuula lubo. Bantu biingi bamuJudaya bakamvwa makani akuzyalwa kwamwana ooyu alimwi bakali kulibuzya kuti: ‘Uyooba mwana ulibiyeni ooyu?’

Zakkariya wakazula muuya uusalala. Wakasinsima kuti: ‘Alumbwe Jehova. Wakasyomezya Abrahamu kuti  uyootuma mufutuli, Mesiya kuti azootununune. Johane uyooba musinsimi alimwi uyoobambila Mesiya nzila.’

Kuli chimwi chintu chigambya chakachitika kuli Mariya, nzubo yaElizabbeti. Tuyooyiya atala anchicho muchiiyo chitobela.