Jun sacerdote sbʼiʼil Zacarías sok Elisabet ja xcheʼumi, ti ajyiye mojan bʼa Jerusalén. Ekʼelxa mas ja 400 jabʼil masan tojbʼikan ja bardaʼik bʼa Jerusalén. Ja Zacarías soka Elisabet jitsanxa jabʼil nupanele, pe mey yuntikile. Jun kʼakʼu, yajni ja Zacarías wan stsikjel pom ja bʼa lugar Sak ja bʼa templo, jak sjeʼ sbʼaj ja anjel Gabriel. Ja Zacarías jel xiwi, pe ja Gabriel yala: «Mok xiwan. Ay kiʼojanawi lekil yaljelik bʼa Jyoba. Jawa cheʼum, Elisabet, oj ajyuk jun skerem, sok oj sbʼiʼiluk Juan. Ja Jyoba stsaʼunej ja Juan bʼa jun aʼtel jel chaʼanyabʼalil». Ja Zacarías sjobʼo: «¿Jastal oj naʼ ta meran ja jas waxa wala? Ja keʼn soka jcheʼumi jelxa awelotikon bʼa oj ajyuk jun jkeremtikon». Ja Gabriel sjakʼa: «Yeʼn sjekunejon ja Dyos bʼa jakel yaljela wabʼ ja lekil yaljel it. Pe yuja mi akʼuʼanoni, mini oj bʼobʼ kʼumanan masan xpojki ja yal keremi».

Ja Zacarías kan mas albʼel tyempo ja bʼa lugar Sak ja bʼa templo. Yajni eli, ja matik wane majlanel bʼa jwera wani skʼanawe snajel jasa ekʼi. Pe ja Zacarías mi xbʼobʼ kʼumanuk, kechan wa xbʼobʼ sjeʼ senya soka skʼabʼi. Anto ja ixuk winiki snaʼawe ja yeʼn ajiyi jun rason bʼa Dyos.

Ekʼ ja tyempo, ja Elisabet maloʼaxi sok ajyi jun yal skerem, jastalni yalunej ja anjeli. Ja yamigoʼik soka spamilya ja Elisabet waj yile ja yal alatsi. Jaxa yeʼnle jel gustoʼaxiye soka Elisabet. Ja Elisabet yala: «Oj sbʼiʼiluk Juan». Ja yeʼnle yalawe: «Mini june bʼa wa pamilya wa sbʼiʼilan Juan. Mas lek awik sbʼiʼiluk Zacarías, jastal stat». Pe ja Zacarías stsʼijbʼan: «Juan oj yiʼ ja sbʼiʼili». Ja bʼa jutsʼin jaw, ja Zacarías bʼobʼxa kʼumanuk. Chʼak yabʼye yabʼalil sbʼaja yal alats it bʼa yibʼanal ja Judea. Sok wa sjobʼo sbʼaje: «¿Jasa oj skʼuluk ja yal kerem it yajni xkʼiʼi?».

Anto ja Zacarías ti iji majan yuja yip ja Dyosi sok yala jun jasunuk oj ekʼuk: «¡La jtoytik ja Jyoba! Ja yeʼn skʼapayi ja Abrahán bʼa oj sjek jun koltanum, ja Mesías, bʼa oj ya  elkotik libre. Jaxa Juan oj kʼot jun aluman bʼa oj xchap ja bʼej sbʼaja Mesías».

Cha ay jas ekʼ sbʼaj jel chaʼanyabʼal jun spamilya ja Elisabet sbʼiʼil María. Ti oj kiltik ja bʼa kapitulo jakumi.