Winim 400 yia bihain long ol i wokim gen banis bilong Jerusalem, wanpela pris nem bilong em Sekaraia na meri bilong em, Elisabet, i stap klostu long Jerusalem. Tupela i bin marit inap planti yia, tasol ol i no gat pikinini. Wanpela taim Sekaraia i mekim ofa i gat gutpela smel insait long tempel, na ensel Gebriel i kamap long em. Sekaraia i pret, tasol Gebriel i tok: ‘No ken pret. Mi bringim gutnius bilong Jehova i kam. Meri bilong yu, Elisabet, bai karim wanpela pikinini man na yu mas kolim nem bilong em Jon. Jehova i makim Jon long mekim wanpela spesel wok.’ Sekaraia i askim: ‘Hau bai mi bilipim tok bilong yu? Mi na meri bilong mi i lapun pinis na mipela i no inap kamapim pikinini.’ Gebriel i tok: ‘God i salim mi i kam bilong givim dispela gutnius long yu. Tasol yu no bilipim tok bilong mi, olsem na yu no inap toktok i go inap long bebi i bon.’

Sekaraia i stap long ples holi longpela taim winim ol narapela taim. So taim em i kam aut, ol manmeri i wet ausait i laik save wanem samting i kamap. Sekaraia i no inap toktok. Em inap mekim sain long han tasol. Na ol manmeri i luksave olsem Sekaraia i mas kisim wanpela tok i kam long God.

Bihain, Elisabet i gat bel na karim bebi boi, olsem ensel i bin tok. Ol pren na wanblut bilong em i kam long lukim bebi. Ol i amamas tru long em. Elisabet i tok: ‘Nem bilong em Jon.’ Ol i tok: ‘I no gat wanpela long famili bilong yu i gat nem Jon. Kolim em Sekaraia, em nem bilong papa bilong em.’ Tasol Sekaraia i raitim dispela tok: ‘Nem bilong em Jon.’ Long dispela taim stret, Sekaraia inap toktok gen! Stori bilong dispela bebi i go long olgeta hap bilong Judia, na ol manmeri i laik save: ‘Dispela pikinini bai kamap wanem kain man tru?’

Bihain holi spirit i pulap long Sekaraia. Na em i tok profet olsem: ‘Preisim Jehova. Em i tok promis long  Abraham olsem em bai salim wanpela seivia, Mesaia, long kisim bek yumi. Jon bai kamap profet, na em bai redim rot bilong Mesaia.’

Wanpela spesel samting tu i kamap long wanblut bilong Elisabet em Maria. Yumi bai painimaut long neks sapta.