Иерусалимниң ханаларын тутканындан бээр 400 чыл эрте берген. Иерусалимден ырак эвеске өргээ бараалгакчызы Захария биле ооң кадайы Елисавета чурттап чораан. Өгленгенинден бээр хөй чыл эрткен-даа болза, оларның ажы-төлү чок турган. Бир катап Захария өргээниң ыдыктыг өрээлинге фимиам кыпсып турда, Гавриил дээр ангел көстүп келген. Захария корга бээрге, Гавриил аңаа: «Кортпа, мен сеңээ Иеговадан эки медээ эккелдим. Кадайың Елисавета оол божуп бээр, а сен ону Иоанн деп адап алыр сен. Иегова ону тускай бараалгалга шилип алган-дыр» — дээн. Захария: «Ындыг чүүл болдунар бе? Төлдүг боор хире эвес улуг назылыг болгай бис» — деп ангелге чугаалаан. Гавриил аңаа: «Бо медээни дамчыдар кылдыр, мени сенче Бурган чоргузупкан. Меңээ бүзүревээниң дээш, төлүң төрүттүнеринге чедир үн чок боор сен» — дээн.

Захария ыдыктыг өрээлге биеэгизинге бодаарга үр болган. Ону манап турган улус ол үнүп кээрге, чүү болганын айтырып эгелээн. Захария чүгле имнээринге өй болган. Ынчан кижилер ол Бургандан медээ алган-дыр деп билип каан.

Ангелдиң чугаалааны дег, Елисавета иштели бергеш, оол божуп алган. Ооң эш-өөрү, дөргүл-төрели оолду көөр дээш чедип келген. Олар Елисавета дээш дыка өөрүп турган. Елисавета: «Ооң ады Иоанн боор» — дээрге, улус кайгап: «Силерниң төрелдериңерде ындыг аттыг кым-даа чок болгай. Адазы ышкаш Захария деп алыңар» — дижип турган. Ынчалза-даа Захария бичии ыяшка: «Ооң ады Иоанн» деп бижип каан. Ол дораан Захарияның чугаа-сөзү үнүп келген! Ол төлдүң дугайында медээ бүгү Иудеяга тарай берген. «Бо чаш төл кым болур ирги?» — деп, улус айтыржып турган.

Захария ыдыктыг сүлдеге бүргеткеш, мындыг өттүр билген сөстер чугаалаан: «Иегова алдаржызын! Иегова бисти камгалаар дээш, Камгалакчы Мессияны  чорударын Авраамга аазаан. Иоанн медээчи болур база Мессияның кээринге чедир чонну белеткээр».

Елисаветаның Мария дээр төрели турган. Ооң-биле база кайгамчык чүүл болган. Ону дараазында эгеде көөр бис.