Noke yoku pita 400 kanyamo tunde eci ovimbaka vio Yerusalãi via tumbuluiwa, ocitunda cimue ci tukuiwa hati Sakariya kuenda ukãi waye Elisavete, va tungile ocipepi lolupale. Pa pitile ale anyamo alua tunde eci va kuela, pole, ka va kuatele omãla. Eteke limue osimbu Sakariya a kala oku timĩha isensu vocitumãlo ci kola conembele, ungelo Gabriele wa molẽha. Sakariya wa kala lusumba, pole, Gabriele wo sapuila hati: ‘Ku ka kuate usumba. Ndu ku sapuila olondaka viwa vi tunda ku Yehova. Ukãi wove Elisavete o ka cita omõla umue ulume kuenje o ka tukuiwa hati, Yoano. Yehova wa nõla Yoano oco a linge upange umue ulikasi.’ Sakariya wa pula hati: ‘Ndi kolela ndati kokuove? Ame kumue lukãi wange tua kuka ale oco tu kuate omõla umue.’ Gabriele wa popia hati: ‘Ame nda tumiwa la Suku oco ndu ku sapuile olondaka evi. Pole, omo kua kolelele kokuange, ku ka tẽla oku vangula toke eci oñaña yi citiwa.’

Sakariya wa kala otembo yalua vocitumãlo ci kola okuti otembo a siata oku kalamo yi sule. Kuenje eci a tunda, omanu vana va kala oku talamẽla posamua, va yonguile oku kũlĩha ovina via pita laye. Sakariya ka tẽlele oku vangula. Eye wa ponduile lika oku linga ondimbukiso loku ilaika lovaka aye. Kuenje omanu va limbuka okuti Sakariya wa tambula esapulo limue li tunda ku Suku.

Vokuenda kuotembo, Elisavete we mina kuenje wa cita oñaña yimue yulume ndeci ungelo a ci popele. Akamba va Elisavete kuenda vangandiaye veya oku tala oñaña. Ovo va sanjukila calua Elisavete. Elisavete wa popia hati: ‘Onduko yaye eye Yoano.’ Ovo va popia vati: ‘Vepata liene lomue o tukuiwa londuko Yoano. Onduko yaye Sakariya okuti onduko ya isiaye.’ Pole, Sakariya wa soneha olondaka viokuti: ‘Onduko yaye Yoano.’ Vepuluvi liaco, Sakariya wa fetika oku vangula! Esapulo liatiamẽla koñaña lia lisanduila ku va Yudea vosi kuenda omanu va lipula vovitima viavo vati: ‘Okamõla aka eci ka kula ka ka kala ndati?’

Kuenje Sakariya wa yukisua lespiritu sandu. Eye wa imba owanji hati: ‘Yehova a sivayiwe. Eye wa likuminya ku Avirahama okuti wa laikele oku tuma umue upopeli, Mesiya, oco a tu yovole. Yoano wa laikele oku linga uprofeto kuenda oku pongiyila onjila Mesiya.’

Ocina cimue cilikasi ca pitavo la ngandia a Elisavete okuti, Maria. Tu konomuisa eci catiamẽla kovina viaco vocipama ci kuãimo.