Nga murahu ha miṅwaha ya 400 musi mbondo dza Yerusalema dzo no fhaṱululwa, tshifhe ane a pfi Sakaria na mufumakadzi wawe, Elisabetha, vho vha vha tshi dzula tsini na ḓorobo. Ho vha ho no fhela miṅwaha minzhi vho vhingana, fhedzi vho vha vhe si na vhana. Ḽiṅwe ḓuvha musi Sakaria a tshi khou ṋekedza zwioro fhethu hukhethwa thembeleni, ha bvelela muruṅwa Gabriele. Sakaria o vha o tshuwa, fhedzi Gabriele a ri: ‘Ni songo ofha. Ndo ni farela mafhungo maḓifha a bvaho ha Yehova. Elisabetha, mufumakadzi waṋu, u ḓo beba ṅwana wa mutukana nahone dzina ḽawe u ḓo pfi Yohane. Yehova u ḓo ṋea Yohane mushumo wo khetheaho.’ Sakaria a vhudzisa a ri: ‘Ndi nga ni tenda hani? Nṋe na mufumakadzi wanga ro no aluwa uri ri nga vha na ṅwana.’ Gabriele a ri: ‘Ndo rumiwa nga Mudzimu u ni vhudza enea mafhungo. Fhedzi samusi ni sa ntendi, a ni tsha ḓo kona u amba u swikela musi ṅwana o no bebwa.’

Sakaria a lengesa u bva fhethu hukhethwa. Musi a tshi bva, vhathu vhe vha vha vho mu lindela nnḓa vha ṱoḓa u ḓivha uri ho bvelela mini. Sakaria o vha a si tsha kona u amba. O vha a tshi vho amba nga zwanḓa. Vhathu vha zwi vhona uri Sakaria o wana mulaedza u bvaho ha Mudzimu.

Nga murahu ha tshifhinga, Elisabetha a vhifha muvhilini nahone a beba ṅwana wa mutukana, samusi muruṅwa o amba. Khonani dzawe na mashaka vha ḓa u vhona ṅwana. Vha takala vhukuma nae. Elisabetha a ri: ‘Dzina ḽawe u ḓo pfi Yohane.’ Vhone vha ri: ‘Muṱani wa vhoiwe a huna ane a pfi Yohane. Mu ṋeeni ḽa Sakaria, dzina ḽa khotsi awe.’ Fhedzi Sakaria a ṅwala haya maipfi: ‘Dzina ḽawe ndi Yohane.’ Nga tshenetsho tshifhinga, Sakaria a mbo ḓi dovha a kona u amba! Mafhungo nga ha onoyo ṅwana a phaḓalala kha ḽoṱhe ḽa Yudea nahone vhathu vha ḓivhudzisa vha ri: ‘Uyu ṅwana u ḓo aluwa a vha muthu-ḓe?’

Nga zwenezwo, Sakaria a ḓala muya mukhethwa. A porofita a ri: ‘Yehova nga a rendwe. O fulufhedzisa  Abrahamu uri U ḓo ruma mutshidzi, Messia, u ri tshidza. Yohane u ḓo vha muporofita nahone u ḓo lugiselela Messia nḓila.’

Ha itea tshithu tsho khetheaho na kha Maria shaka ḽa Elisabetha. Kha ri zwi wane kha ndima i tevhelaho.