Paglabay hin sobra 400 ka tuig tikang han natukod utro an mga pader han Jerusalem, usa nga saserdote nga Sakarias an ngaran ngan an iya asawa hi Elizabeth an naukoy hirani han syudad. Maiha na hira nga mag-asawa pero waray hira magkakaanak. Usa ka adlaw, samtang naghahalad hi Sakarias hin insenso ha santuaryo han templo, nagpakita ha iya hi anghel Gabriel. Nahadlok hi Sakarias, pero ginsidngan hiya ni Gabriel: ‘Ayaw kahadlok. May maopay ako nga sumat tikang kan Jehova. Hi Elizabeth nga imo asawa mag-aanak hin lalaki, ngan Juan an iya magigin ngaran. Ginpili hiya ni Jehova para ha usa nga espesyal nga buruhaton.’ Hi Sakarias nagpakiana: ‘Paonan-o ini mahitatabo? Lagas na ako ngan an akon asawa para magkaanak.’ Hi Gabriel nagsiring: ‘Ginsugo ako han Dios para isumat ha imo ini nga mensahe. Pero tungod kay waray ka tumoo ha akon, diri ka makakayakan tubtob nga matawo an bata.’

Hi Sakarias nag-iniha ha santuaryo. Salit paggawas niya, ginhihinulat na hiya han mga tawo kay karuyag nira hibaroan an nahitabo. Pero hi Sakarias waray na pakayakan. Nagsininyas na la hiya. Salit nasabtan han mga tawo nga nakakarawat hiya hin mensahe tikang ha Dios.

Paglabay hin pipira ka adlaw, nagburod hi Elizabeth. Ha urhi, nag-anak hiya hin lalaki sugad han ginsiring han anghel. An iya kasangkayan ngan mga paryente bumisita basi makita an bata. Nalipay gud hira. Hi Elizabeth nagsiring: ‘Juan an igngangaran ha iya.’ Pero nagsiring hira: ‘Waray bisan usa ha iyo pamilya nga Juan an ngaran. Sakarias an igngaran ha iya pariho ha iya tatay.’ Pero hi Sakarias nagsurat: ‘Juan an iya ngaran.’ Hito nga takna, nakayakan utro hi Sakarias! An sumat mahitungod han bata nagsarang ha bug-os nga Judea, ngan naghunahuna an mga tawo: ‘Magigin ano daw la ini nga bata pagdaku niya?’

Tapos, hi Sakarias napuno han baraan nga espiritu. Nagtagna hiya: ‘Pagdayawon hi Jehova. Nagsaad hiya kan Abraham nga magsusugo hiya hin paratalwas, an Mesias, nga  magtatalwas ha aton. Hi Juan magigin propeta, ngan ig-aandam niya an dalan han Mesias.’

May urusahon liwat nga nahitabo ha paryente ni Elizabeth nga hi Maria. Aton kitaon ha sunod nga leksyon kon ano ito.