Nipetraka narikitry Jerosalema Zakaria pisoron̈o ndreky Elizabeta vadiny, 400 taon̈o tafarany ribany tanàna io vita. Efa ela iro fivadiany, fa iro tsy niteraka. Tandraraiky Zakaria nan̈ano fan̈atitry raha mangitry tamy tany masin̈y tamy tempoly tao. Niboaka taminany anjely Gabriela. Navozo Zakaria, fa Gabriela nivolan̈a: ‘Aza mavozo fa zaho iraka Jehovah hivolan̈a vaovao tsara aminao. Hiteraka tsaiky lelahy Elizabeta vadinao, ke hataonao Jaona an̈arany. Izy nifidiny Jehovah han̈ano asa miavaka.’ Ho Zakaria: ‘Zaho tsy mino zen̈y foeky! Zahay fivadiany kony efa matoe e!’ Ho Gabriela: ‘Zan̈ahary kony nan̈iraka zaho handeha aminao aty e. Fotony anao tsy nino volan̈anaka, anao hanjary tsy hahay hivolan̈a firaka tsaiky io teraka.’

Nidoko elaela tamy tempoly tao Zakaria, tsy karaha mahazatra. Izy koa fa niboaka, tianolo ho hay ino raha nandalo. Tsy nahavita nivolan̈a Zakaria, fa izy nan̈etsiketsiky tan̈anany fo. Ke nanjary hainolo fa Zakaria nahazo hafatra baka tamy Zan̈ahary.

Navesatra ankitin̈y Elizabeta ke niteraka tsaiky lelahy, mira raha nivolan̈iny anjely in̈y. Navy amy zay iro havany ndreky namany nizaha tsaiky io sady ravoravo. Ho Elizabeta: ‘Jaona an̈arany.’ Iro nivolan̈a: ‘Tsisy havanaro kony manan̈a an̈aran̈a Jaona zen̈y e, fa ataova Zakaria an̈arany karaha niny babany fo.’ Fa Zakaria ndraiky nanoratra: ‘Jaona an̈arany.’ Nimpody nahay nivolan̈a ndraiky izy taminio. Lany fan̈ahy olo jiaby ta Jodia koa fa naharen̈y raha momba tsaiky io. Iro nivolan̈a: ‘Mba han̈ano karakory eky tsaiky io?’

Zakaria baka tio feno fan̈ahy masiny. Ke izy naminan̈y: ‘Derain̈y Jehovah, fotony izy nivolan̈a taminy Abrahama fa handefa Mesia hamonjy atsika. Jaona hanjary paminan̈y, ke izy han̈oman̈a lalan̈a himboany Mesia.’

 Misy raha nahalany fan̈ahy koa nandalo tamy Maria. Mbala havany Elizabeta izy. Amy toko fan̈araka atsika hahita zen̈y.