Juntúul sacerdote ku kʼaabaʼtik Zacarías yéetel Elisabet u yataneʼ, kajaʼanoʼob kaʼach naatsʼ tiʼ Jerusalén. Tsʼoʼok u máan 400 años desde ka jel líiʼsaʼab u baʼpakʼiloʼob Jerusalén. Zacarías yéetel Elisabeteʼ yaʼab años tsʼoʼokok u beeloʼob, chéen baʼaleʼ minaʼan kaʼach u paalaloʼob. Junpʼéel kʼiin le táan u kʼubik incienso Zacarías tu kiliʼich kúuchil le templooʼ, chíikpaj ángel Gabriel tiʼ. Zacaríaseʼ jach sajakchaji, chéen baʼaleʼ le angeloʼ tu yaʼalajtiʼ: ‹Maʼ a chʼaʼik saajkil. Jéeobaeʼ tu túuxten in waʼaltech junpʼéel jatsʼuts baʼal. Elisabet, a wataneʼ, yaan u yantal juntúul u chan hijo, Juan ken a tsʼáa u kʼaabaʼ. Jéeobaeʼ tsʼoʼok u yéeyik Juan utiaʼal ka u beet junpʼéel nojoch meyaj›. Zacaríaseʼ tu kʼáatajtiʼ: ‹¿Bix jeʼel in wojéeltik wa jach jaaj le baʼax ka waʼaliktenoʼ? Teen yéetel in wataneʼ tsʼoʼok k-chʼíijil utiaʼal ka yanak juntúul k-hijo›. Le ángel Gabrieloʼ tu yaʼalajtiʼ: ‹Dios túuxten utiaʼal ka in tsʼáa a wojéelt le jatsʼuts baʼal kun úuchlaʼ. Chéen baʼaleʼ tumen maʼ ta creertaj le baʼax tin waʼalajtechaʼ, maʼ kun béeytal a tʼaan tak ken síijik le chaambaloʼ›.

Zacaríaseʼ maʼ séeb jóokʼ tiʼ le kiliʼich kúuchiloʼ. Ka jóokʼeʼ táan kaʼach u páaʼtaʼal tumen le máakoʼoboʼ. Letiʼobeʼ taak u yojéeltikoʼob le baʼax tsʼoʼok u yúuchloʼ. Chéen baʼaleʼ Zacaríaseʼ maʼ tu páajtal u tʼaan, chéen señas ku beetik kaʼachi. Le máakoʼoboʼ tu tsʼáajoʼob cuenta yaan baʼax aʼalaʼabtiʼ tumen Dios.

Ka máan kʼiineʼ Elisabeteʼ pʼáat embarazadail yéetel anchaj juntúul u chan hijo, jeʼex tu yaʼalil le angeloʼ. U amigoʼob yéetel u láakʼtsiloʼob Elisabeteʼ taal u kʼaj óoltoʼob le chaambaloʼ yéetel kiʼimakchaj u yóoloʼob. Elisabeteʼ tu yaʼalaj: ‹Yaan u kʼaabaʼtik Juan›. Letiʼobeʼ tu yaʼaloʼobtiʼ: ‹Mix máak bey u kʼaabaʼ ichil a láakʼtsiloʼoboʼ. Maas maʼalob ka a tsʼáa Zacarías tiʼ, jeʼex u papaeʼ›. Chéen baʼaleʼ Zacaríaseʼ tu tsʼíibtaj: ‹Juan ken u kʼaabaʼte›. Teʼ súutukoʼ Zacaríaseʼ béeychaj u kaʼa tʼaan. Tiʼ tuláakal Judea ojéeltaʼab u tsikbalil le chaambal tsʼoʼok u síijiloʼ. Le máakoʼoboʼ joʼopʼ u yaʼalikoʼob: ‹¿Baʼax wal ken u beet le chan xiʼipal ken nojochchajkaʼ?›.

Zacarías túuneʼ chuʼup yéetel kiliʼich muukʼeʼ ka tu yaʼalaj  le profecíaaʼ: ‹¡Alabartaʼak Jéeoba! Letiʼeʼ tu yaʼalaj tiʼ Abrahán yaan u túuxtik le Mesías utiaʼal u salvartikoʼonoʼ. Juan ken u beet u profetail utiaʼal u listokíintik u beel le Mesíasoʼ›.

Úuch xan junpʼéel jatsʼuts baʼal tiʼ María, juntúul u láakʼtsilil Elisabet. Lelaʼ yaan k-ilik teʼ tuláakʼ xookoʼ.