Ti sacerdote láʼ Zacarías ne xheelaʼ, Elisabet, gulézacaʼ gaxha de Jerusalén. Maʼ gudiʼdiʼ jma de tapa gayuaa iza dede dxi bibiguetaʼ gurí ca muru stiʼ Jerusalén. Maʼ ziné Zacarías ne Elisabet stale iza de bichaganacaʼ, peru qué ganda gápacaʼ xiiñicaʼ. Ti dxi laga cuzaaquiʼ Zacarías incienso ndaaniʼ santuariu stiʼ templu que, málasi bidxiña ángel Gabriel ra nuube. Guizáʼ bidxibi Zacarías, peru gudxi ángel que laabe: «Cadi guidxíbiluʼ. Zedaniáʼ noticia galán para lii ni zeeda de Jiobá. Zapa xheelaluʼ Elisabet ti xiiñiʼ, ne zaree labe Juan. Maʼ gulí Jiobá laabe para gúnibe ti dxiiñaʼ nabé risaca». Zacarías gunabadiidxaʼ: «¿Ximodo gannaʼ dxandíʼ ni cayábiluʼ naa ca yaʼ? Naa ne xheelaʼ maʼ huaniisidu para gápadu xiiñidu». Para bicabi ángel Gabriel laabe: «Biseendaʼ Dios naa para gudieeʼ lii noticia riʼ. Peru cumu qué ñuni creluʼ naa la? qué zanda guiniʼluʼ dede dxi gale baʼduhuiiniʼ ca».

Biaana Zacarías ndaaniʼ santuariu que jma que biaʼ rindaa ti sacerdote. Ora bireebe, guiráʼ binni nuu fuera que nuu ganna xi guca. Peru qué ñanda niníʼ Zacarías, seña si gunda bíʼnibe. Óraque bidii ca binni que cuenta gucuaabe ti mensaje stiʼ Dios.

Gudiʼdiʼ si ti tiempu, gucaxiiñiʼ Elisabet ne gupa ti hombrehuiiniʼ, casi maca guníʼ ángel que. Ca familia Elisabet ne ca xhamigu yeguuyacaʼ baʼduhuiiniʼ que ne biechenecaʼ laabe. Elisabet guníʼ: «Juan chiguiree labe». Óraque guníʼcabe: «Qué gápaluʼ nin ti familia láʼ zacá. Mejor lacuee lá laabe Zacarías, casi bixhózebe». Peru Zacarías bicaa: «Juan nga labe». Ne oraqueruʼ, maʼ gunda guniʼbe sti biaje. Gunna guidubi guidxi Judea de baʼduhuiiniʼ que ne gunabadiidxacabe: «¿Tu ndaʼ gácabe ora guiniisibe yaʼ?».

Óraque gucuaa Zacarías espíritu santu ne guníʼ ti profecía: «¡Gusisácanu Jiobá! Gúdxibe Abrahán zuseendabe  Mesías, tobi ni chigulá laanu. Ne zaca Juan ti profeta ni chiguxheleʼ neza stiʼ Mesías ca».

Laaca zaqueca bizaaca ti familia stiʼ Elisabet ni biree lá María. Zadúʼyanu ni lu sti capítulo ca.