Gahxca Jerusalén golés toib sacerdote ni góc laa Zacarías né tzeelbu góc laa Elisabet. Ló dzúcu ma godudy más de 400 íz de goló golísyibu muros xtuny Jerusalén. Par ló dzúcu Zacarías né Elisabet ma xidzú de goló bunyibu galtzeʼel né diti goyoʼ xiinyibu. Toib dzú, órni Zacarías cayony goʼox lainy templo, ángel Gabriel bidxin ronoʼbu. Zacarías nigolú bidzuiby, per Gabriel góoch láabu: «Diti guidzuibylo. Jehová bixel naʼ par gaabi cós sacróyen looy. Tzeʼel lo Elisabet sap toib badaʼ né gac laabu Juan. Jehová ma golúbu Juan par gony toib dxiin ni rasac». Zacarías gonabdiitzbu Gabriel: «¿Ximod gaana que nigolú ni nálo? Tzeʼel la né naʼ ma nacdo buñgol par tzoʼ xiindo». Gabriel cuapy láabu: «Dios bixel naʼ par gaabi diitz sacró reʼ looy. Per diti bunylo crer naʼ, por ngú diti labúu saniʼlo dada dzú gál badaʼ reʼ».

Dzúcu Zacarías goclabu más lainy templo que stipnés ór. Órni bireʼbu, buñ ni golés láabu fuer ná ñan xi gosaclobu. Per Zacarías diti labúu goniʼ, por señsi bunybu. Ór cú buñ biduidy cuent que noʼ ni góoch Dios láabu.

Después, Elisabet gocxiin né gopbu toib badaʼ mod goniʼ ángel Gabriel. Ximig né xfamily Elisabet goyeeyibu bibiʼyibu badaʼcu né bibaladxyibu. Elisabet goniʼ: «Juan gac laabu». Xfamilbu né ximigbu cuapy: «Diti noʼ ni toib xfamilylo ni laa Juan. Más galán goleʼ laabu Zacarías, tzanébu laa bixiosbu». Per Zacarías bicaʼ laidy tlaʼ tabla: «Juan gac laabu». ¡Órcuca Zacarías ma labúu goniʼ! Lainy guidopy gudx Judea gon buñ de badaʼyencu né buñ gosaló gonabdiitz: «¿Xí dxiin gony nidxiyen reʼ órni niʼsbu?».

Ór cú Zacarías cuaʼ espíritu santo né goniʼbu profecía reʼ: «¡Gonyxiroʼno Jehová! Láabu biduidybu  xtiitzbu Abrahán que saxelbu Mesías, toib buñ ni guilaa lóono. Né Juan gac toib profeta ni gonytzaay néz par guidxin Mesías».

Láaca noʼ ni gosaclóo María toibtica xfamily Elisabet. Ló stoib lesiony guibiʼno xi gosaclobu.