Elisabet het ’n jong familielid met die naam Maria gehad, wat in die stad Nasaret in Galilea gebly het. Maria was verloof aan ’n timmerman met die naam Josef. Toe Elisabet ses maande swanger was, het die engel Gabriël aan Maria verskyn. Hy het gesê: ‘Goeiedag, Maria. Jehovah wil aan jou ’n groot voorreg gee.’ Sy het nie verstaan wat Gabriël bedoel nie. Hy het toe vir haar gesê: ‘Jy sal swanger word en geboorte gee aan ’n seun, en jy moet hom Jesus noem. Hy sal Koning wees en sy Koninkryk sal vir ewig bestaan.’

Maria het gesê: ‘Maar ek is ’n maagd. Hoe kan ek ’n kind hê?’ Gabriël het gesê: ‘Daar is niks wat Jehovah nie kan doen nie. Heilige gees sal oor jou kom, en jy sal ’n seun hê. Jou familielid Elisabet het ook swanger geword.’ Toe het Maria gesê: ‘Ek is Jehovah se slavin. Mag dit met my gebeur net soos u gesê het.’

 Maria het vir Elisabet, wat in ’n stad in die berge gebly het, gaan kuier. Toe Maria haar groet, het Elisabet gevoel hoe die baba in haar spring. Heilige gees het oor haar gekom, en sy het gesê: ‘Maria, Jehovah het jou geseën. Dit is ’n voorreg om die ma van my Here in my huis te hê.’ Maria het gesê: ‘Ek loof Jehovah met my hele hart.’ Maria het drie maande lank by Elisabet gebly, en toe het sy huis toe gegaan, na Nasaret toe.

Toe Josef uitvind dat Maria swanger is, wou hy die verlowing verbreek. Maar ’n engel het in ’n droom aan hom verskyn en vir hom gesê: ‘Moenie bang wees om met haar te trou nie. Sy het niks verkeerds gedoen nie.’ Josef het Maria toe as sy vrou geneem en haar na sy huis toe gebring.