Elisabeti ubino ku wat pare moko ma nyaku ma nyinge Maria, m’ubed ukwo i adhura mi Nazareti i Galilaya. Yosefu ma jagob bau re ma nwang’u ubegamu Maria. Kinde ma Elisabeti udoko ku mugisa mi dwi abusiel, malaika Gabriel uwok ni Maria. Ewacu ire kumae: ‘Moth iri, Maria. Inwang’u bero ma lee i wang’ Yehova.’ Ento Maria unyang’ ungo i lembe ma Gabriel umito yero ire. Gabriel uwacu ire kumae: ‘Ibigamu ii man ibinyolo nyathin ma nico, e ibilwong’o nyinge Yesu. Ebibedo Ubimo. Man Ker pare bibedo mi nja.’

Maria udwoko ire kumae: ‘An ang’eyo co ngo. Abinyolo nyathin nenedi?’ Gabriel uwacu ire kumae: ‘Gin moko mbe ma copere ngo ni Yehova. Tipo maleng’ bibino i wii man ibinyolo nyathin ma nico. Elisabeti ma wat peri de unwang’u ic.’ I ng’eye, Maria udwoko ire kumae: ‘An a nyaku ma ng’eca pa Yehova. Dong’ wek etimere ira tap calu m’iwacu.’

 Maria ugam ucidho i adhura mi ng’om gudi pi niliewo Elisabeti. Kinde ma Maria umothe ci, Elisabeti uwinjo nyathin m’i iye ujugo. Tipo maleng’ urome, e eyero ni Maria kumae: ‘Maria, Yehova upoko mugisa i wii. Etie yung nijolo min Rwoth para i ot para.’ Maria udwoko ire kumae: ‘Abeyungo Yehova kud adundena ceke.’ E Maria ubedo i bang’ Elisabeti pi dwi adek, kan i ng’eye edok i Nazareti.

Kinde ma Yosefu uwinjo nia ii Maria unuti, emito ejig lemb gamiri migine cen. Ento malaika uwok ire ku wang’ lek man uyero ire kumae: ‘Lworo kud unegi nigamu Maria. Etimo ngo lembe moko ma rac.’ E Yosefu ugamu Maria ni dhaku man edok kude i bang’e.