Adong ma keluarga ni si Elisabet na margoar si Maria. Ibana tinggal di Nasaret na di Galilea. Nunga naeng kawin ibana dohot sahalak tukang hau na margoar si Josep. Dung onom bulan si Elisabet hamil, ro ma si Gabariel manjumpangi si Maria. Didok ma, ‘Horas Maria! Las do roha ni Debata mangida ho.’ Ndang diantusi si Maria lapatan ni hata i. Didok si Gabariel ma muse, ‘Laho hamil nama ho jala manubuhon anak. Bahen ma goarna Jesus. Laho gabe Raja do ibana, jala sahat tu saleleng ni lelengna do Harajaonna i.’

Didok si Maria ma, ‘Ndang mungkin ahu hamil. Ndang kawin dope ahu.’ Alai didok si Gabariel ma, ‘Ndang adong na so tarbahen ni Jahowa. Laho manubuhon anak nama ho marhite-hite tondi parbadia. Si Elisabet keluargami pe, nunga hamil.’ Dung i didok si Maria ma, ‘Hatoban ni Jahowa do ahu. Saut ma na didokmi.’

 Dung i, laho ma si Maria manjumpangi si Elisabet. Tingki didok si Maria tu si Elisabet, ‘Horas!’ manggunjal ma pese-pese na di butuha ni si Elisabet. Mandapot tondi parbadia ma ibana, didok ma, ‘Maria, lomo do roha ni Jahowa mangida ho. Sada hasangapon do ro omak ni Messias tu jabungku.’ Didok si Maria ma, ‘Hupuji ma Jahowa sian nasa rohangku.’ Disi ma si Maria saleleng tolu bulan. Dung i, mulak ma ibana tu jabuna di Nasaret.

Dung diboto si Josep na hamil si Maria, naeng ditinggalhon ibana ma si Maria. Alai ro ma suru-suruan manang malaikat tu nipi ni si Josep, didok ma, ‘Kawin ma ho tu si Maria. Unang mabiar ho. Ndang adong diulahon ibana na sala.’ Dung i, kawin ma si Josep dohot si Maria.